Turmush — Чүй облусунун Чүй районуна караштуу Чүй айыл аймагындагы жергиликтүү тургундар аймактык оорукананын жана мурунку ичеги-карын иштетилген цехтин аймагынан келген саркынды суу сыртка чыгып, талааны каптап жатканын айтып чыгышты.
Бул маселени Токмок шаардык кеңештин депутаты Амантур Шамшибеков да көтөргөн.
Ал эми жергиликтүү бийлик өкүлдөрү кечээ, 14-апрель күнү комиссия менен жеринен көйгөйдү көрүп чыгышканын билдиришти.
Маалыматка караганда, Чүй райондук ооруканасынан чыккан саркынды суу түтүгүнүн талаага жакын жердеги кудугу бузулуп, саркынды суу жер бетине агып чыккан. Саркынды суу линиясы мурдагы ичеги-карын иштетилген заводдун жеринен өтөт. Учурунда ал жерде агынды сууларды чогултуучу бассейнден борбордук канализацияга өткөрүүчү насостук станция иштеп турчу.
«Бул окуяга байланыштуу ыкчам түрдө Чүй райондук ооруканасынын, жергиликтүү өз алдынча башкаруу органдарынын жана «Токмок суу канал» муниципалдык ишканасынын өкүлдөрүнүн катышуусунда комиссиялык иш-чара уюштурулду. Учурда насостук жабдуулар жок болгондуктан системаны толук иштетүү мүмкүн эмес», - деп айтылат маалыматта.
«Токмок суу каналы» муниципалдык ишканасы билдиргендей, аталган канализация тармагы каттоодо жок. Бирок буга карабастан, ишкана таштандыларды чогултуп, бассейнден сордурууга жардам берүүгө даяр.
Бул толук кандуу чечим кабыл алынганга чейинки убактылуу чара болуп эсептелинет.