Turmush — Ош шаарындагы жалгыз тез жардам борборунун имараты 96 жыл мурун курулуп, жараксыз абалга келди. Бул тууралуу кечээ, 10-апрелде президенттин Ош шаарынын тургундары менен жолугушуусунда Ош шаардык тез жардам борборунун кызматкери Замира Токтосунова билдирди.
Анын айтымында, учурда имарат авариялык абалда.
«Биздин имаратыбыз 1932-жылы курулган. Өтө эскилиги жетип, шартыбыз жакшы эмес. Ошону үчүн сизден имаратты жаңыдан куруп берүүңүздү суранат элек. Көп жерлерге кайрылдык, бирок ушул убакка чейин реакция болбой жатат», - деди ал.
Өлкө башчы имарат канча чарчы метрде жайгашканын сурады.
Ош шаардык ыкчам медициналык жардам борборунун директору Мирболот Султанов : «Азыр имаратыбыз 150 чарчы метрден ашык жерде турат. Андан сырткары гараждарыбыз бар. Гараждарыбыз да эски абалда. 1932-жылы курулган. Андан бери эч кандай капиталдык оңдоп-түзөөдөн өткө эмес», - деди ал.
Президент: - Канча тез жардам унааңар бар?
Мирболот Султанов: - Бизде 26 унаа бар.
Президент: - Шаар боюнча бир гана тез жардам участогу ошол эле жерби?.
Мирболот Султанов: - Бир эле ошол жер.
Президент: - Имарат өзү 150 чарчы метр дейсиң ээ?
Мирболот Султанов: - 150 чарчы метр. Бир кабатынын пайдубалы жер менен бир болуп калган. 2017-жылы ӨКМ тараптан «сноско» деп берилген. Бирок 2017-жылдан бери ар жакка кат жазабыз, жооп болбой жатат.
Президент: - Макул, мен өзүмдүн эле демөөрчүлүк фондумдан эле курдуруп берейинчи. Булардан кат алып туруп, мага алып келесиң, мен кол коюп берем, сен курасың, курулуш министри [Нурдан Орунтаев]. Сметасын чыгарып, кургула. Көп деле эмес экен. 150 чарчы метр экен. Эми азыр заман талабына ылайык кылып 200-250 чарчы метр кылып бергиле имаратын, анан гараждын жана башкалардын сметасын алып келесиңер.