Turmush — Бүгүн, 8-апрелде Москва районунда прокуратура кызматкерлери жеке ишкерлерди жана жергиликтүү бийлик органдарын текшерүүнүн мыйзамдуулугун түшүндүрдү. Бул тууралуу прокуратурадан билдирди.
Маалыматка караганда, президенттин 2026-жылдын 27-апрелинде өткөн кеңешмесинде кабыл алынган 2025-жылдын жыйынтыктары жана келерки мезгилге карата милдеттер жөнүндө протоколдук чечимин аткаруунун алкагында прокуратура органдары тарабынан ишкерлерди жана жергиликтүү бийлик органдарын текшерүүлөрдүн мыйзамдуулугун камсыз кылуу боюнча тиешелүү иштер жүргүзүлүүдө. Аталган чечимге ылайык, укук коргоо органдары жана күч түзүмдөрү тарабынан ак ниет иш жүргүзгөн ишкерлерге жана жергиликтүү бийлик өкүлдөрүнө карата негизсиз текшерүүлөрдү жүргүзүүгө жол берилбеши негизги милдет катары белгиленген.
Бул багытта прокуратура органдары мамлекеттик органдардын ишмердүүлүгүнүн мыйзам талаптарына шайкештигин камсыз кылууга, жергиликтүү өз алдынча башкаруу органдарынын жана ишкердик субъекттеринин мыйзамдуу укуктарын коргоого багытталган көзөмөл иштерин системалуу түрдө жүргүзүүдө.
Мыйзам талаптарына ылайык, ишкердик субъекттерине жана жергиликтүү өз алдынча башкаруу органдарына карата текшерүүлөр белгиленген тартипте гана жүргүзүлөт жана бардык текшерүүлөр прокуратура органдарында милдеттүү түрдө каттоодон өткөрүлөт. Бул механизм текшерүүлөрдүн мыйзамдуулугун камсыз кылууга жана негизсиз кийлигишүүлөрдү алдын алууга багытталган.
Президенттин жарлыктарына ылайык, ишкердик субъекттерине карата текшерүүлөргө убактылуу чектөөлөр жана мораторий киргизилип, текшерүүлөр мыйзамда каралган өзгөчө учурларда гана жүргүзүлүшү мүмкүн.
«Прокуратура органдары тарабынан мыйзамсыз жана кайталап жүргүзүлгөн текшерүүлөргө бөгөт коюу, ишкерлердин укуктарын коргоо, инвестициялык климатты жакшыртуу жана мамлекеттик органдардын жоопкерчилигин жогорулатуу боюнча иштер мындан ары да улантылат», - деп айтылат маалыматта.