Turmush — Лейлек районунда пенсионерлерден акча кармалып жатканы жөнүндөгү маалымат чындыкка дал келбейт. Бул тууралуу «Кыргыз почтасы» ААКтын Лейлек районундагы филиалынын жетекчиси Бакыт Пирматов билдирди.
- 2023-жылдын 21-декабрында Жогорку Кеңештин жыйынында депутат Миргүл Темирбаева Лейлекте почта кызматкерлери пенсиянерлердин акчасынан кармап калууда деген маалымат айткан.
Анын айтымында, буга чейин Жогорку Кеңеште айтылган маалымат боюнча Лейлек райондук почта кызматкерлери тарабынан сурамжылоо жүргүзүлүп, жыйынтыгында маалымат чындыкка дал келбестиги аныкталды. Районундогу четки айылдарда почта аркылуу пенсия алган жарандардан маалымат сурап чыгышкан. Натыйжада акча кармап калуу катталган эмес. Жана алар убагында акчаларын алып жатышканын кошумчалашты.
«Биз Жаңы-Жер айыл өкмөтүнүн Арка айылында турабыз. Биз кары-картаңдар үчүн ушул эле айылдан акча алуу ыңгайлуу. Буга чейин айтылгандай пенсиядан эч кандай акча кармап калуу деген жок. Толук акчабызды алып жатабыз. Убагында кызматкерлер акчаларды которушат. Мындан артыгы болбойт», - деди Арка айылынын тургуну Акжол Ганыев.
«Биз Коммунизм айылынын тургундарыбыз. Мен жеке өзүм 10 жылдан бери пенсия алам. Ушул убакка чейин акча кармап калуу каттала элек. Эч кандай эски газеталар таркатылбайт. 100-50 сом да алынбайт», - деди Коммунизм айылынын тургуну Гүлмира Калмурзаева.
«Кыргыз почтасы» ААКтын Лейлек районундагы филиалы Лейлек районунун аймагындагы 6530 пенсионерди тейлейт. Район борборунан 100-120 чакырым алыстыкта жайгашкан айылдардын пенсионерлери борборго келүүгө чамалары жетпейт. Мындан улам алар аймактардагы почта аркылуу акча алышат. Мында атайын келишим менен карта ачтырып, банк аркылуу алгандар да бар. Мындай учурда 1% кызмат акы алынат. Райондук почта жетекчиси айтылып жаткан маселе ушул болсо керек дейт.
«Биз райондогу пенсионерлердин 30% тейлейбиз. Башкача айтканда алыскы чек арада турган айылдардагы 6530 пенсионер биз аркылуу пенсия алышат. Аларга айылдардагы биздин кызматкерлер жеткиришет. Көрсөтүлгөн сумманы алганда алуучу кол коюп алышат. Анан эч кандай газета таркатылбайт.
Бизде атайын банк менен келишим түзүп банк аркылуу да алгандар бар. Анда 1% кызмат акы алынат. 5 миң алса 50 сом, 10 миң сом алса 100 сом алынат. Мүмкүн ушуну түшүнбөй жаткандар айтышкандыр. Биз сурамжылоо да жүргүзүп, текшерип чыктык, нараазычылык жок», - деди Бакыт Пирматов.