Turmush — Ош мамлекеттик университетинин башкы имаратында «Bilimfest-2023» ачык эшиктер күнү өттү.
Ачык эшиктер күнүнүн салтанаттуу ачылышында сөзгө чыккан ОшМУнун ректору Кудайберди Кожобеков мектеп бүтүрүүчүлөрүн куттуктап, ОшМУ тууралуу маалымат берди.
Кесипке багыт берүүнү максат кылган иш-чарага Ош, Жалал-Абад, Баткен облустарындагы жана Ош шаарындагы 3 миңден ашуун мектеп бүтүрүүчүлөрү, орто кесиптик билим берүүчү окуу жайлардын бүтүрүүчүлөрү, ата-энелер катышты.
Билим фестивалынын жүрүшүндө окуу жайдын ректору Кудайберди Кожобеков баштаган ректорат жамааты, келген коноктор факультеттер, институттар, колледждер, лицейлер тартуулаган билим жармаңкеси менен таанышты. Ошондой эле каалаган адистиктер боюнча маалымат алып, студенттердин колунан жасалган жаңы табылгалар, ойлоп табууларга күбө болушту.
Абитуриенттердин билимге болгон ынтызарлыгын күчөткөн университеттин окуудан жана спорттон мыктыларынын парады көрсөтүлдү.
Мындан сырткары мектеп бүтүрүүчүлөрү студенттер, окутуучулар менен кызыктуу жолугушууларды өткөрдү. Бүтүрүүчүлөр тематикалык презентацияларга, сынактык тестирлөөргө, викториналарга катышты.
«Bilimfest-2023» ачык эшиктер күнүнө келген мектеп бүтүрүүчүлөрү QR код аркылуу катталышты. Каттоо номурлары аркылуу баалуу белектер ойнотулуп, жеңүүчүлөргө iPhone, ноутбук, смартфон, велосипед, фирмалык рюкзак жана башка эсте каларлык белектер тапшырылды. Баш байге болгон iPhone 13 белегин Кеңеш орто мектебинин окуучусу Нурайым Саттарбекова утуп алды.
Иш-чараны белгилүү теле алып баруучу Эркин Рыскулбеков алып барып, мындан сырткары жаштардын сүймөнчүлүгүнө ээ блогерлер, эстарада ырчылары да чакырылды.