Turmush — Ош облусунун Кара-Суу районундагы Нариман айыл өкмөтүнүн башчысы Тынчтыкбек Садыков 30-апрель күнү «Социалдык контракт» программасынын алкагында аз камсыз болгон үй-бүлөлөргө бизнес ачуу үчүн берилген жөлөк пулдун даректүүлүгүн текшерди.
Айыл өкмөт башчы айылдардагы бир катар үй-бүлөлөрдү кыдырып, мамлекет тарабынан бөлүнгөн каражат кандай пайдаланылып жатканынан кабар алды. Ал жергиликтүү тургундар менен болгон баарлашууда «Каражат даректерине толук жетип жатабы?», «Алар чындап эле жеке ишкерликке багытталуудабы?» деген сыяктуу суроолорду сурап, үй-бүлөлөр бул программанын алкагында иш жүзүндө кандай пайда көрүп жаткандыгына кызыкты.
Жергиликтүү тургундар бул каражатка негизинен тигүүчү машиналарды жана мал сатып алып, ай сайын киреше табууга мүмкүнчүлүк түзүлүп жатканын айтышты.
Быйылкы жылдын эсебинен айыл өкмөттөгү 40тан ашуун үй-бүлөгө мамлекет тарабынан 100 миң сомдон каражат кайтарымсыз берилген.