Turmush — Ош технологиялык университетинде «ОшТУ мырзасы-2023» сынагы өттү. Бул тууралуу окуу жайдан билдиришти.
Маалыматка караганда, бул сынакка ар бир факультеттен жана гуманитардык-технологиялык колледжден жалпы 8 жигит катышты. Аталган иш-чара жаштар комитети тарабынан жаштарды коомдук иштерге аралаштыруу, студенттердин достук мамилесин чыңдоо, интеллектуалдык жана маданий деңгээлин жогорулатуу, көрүүчүлөрдүн маданий эс алуусун уюштуруу, эстетикалык табитин арттыруу, сергек жана активдүү жашоо образын чагылдыруу, мекенчилдикке тарбиялоо максатында уюштурулду.
Сынактын шартына ылайык жигиттерге улуттук жана классикалык баалуулуктар каралаган ар кандай шарттар коюлду. Мырзалар сахнада өздөрүнүн өнөрлөрүн тартуулашып, сынакка коюлган бардык шарттарды аткарышты. Сынак калыстар тобу тарабынан бааланып, жеңүүчү аныкталды.
Баш байгеге технология жана жаратылышты пайдалануу факультетинин стденти Азизбек Парпиев ээ болуп, «ОшТУ мырзасы» аталды. Ал Ташкент шаарына үч күндүк эс алууга жолдомонун ээси болду. Ошондой эле «Ош шаарынын мырзасы» сынагына катышууга мүмкүнчүлүк алды.
Биринчи орунга табигый-техникалык факультетинин студенти Адахан Абдимнапов, экинчи орунга энергетика факультетинин студенти Бекболсун Мурзаев, үчүнчү орунга кибернетика жана маалымат технологиялар факультетинин студенти Актан Жапаров ээ болушту. Ал эми «ОшТУ инстаграм мырзасы» номинациясына Актан Жапаров ээ болду.
Жеңүүчүлөр окуу жайдын жетекчилиги тарабынан баалуу белектер менен сыйланышты.