Turmush — Коомдо энелердин орду өзгөчө. Айрыкча көп баланы тарбиялап, ар бирине мээримин төгүп, татыктуу инсан кылып өстүргөн энелер — чыныгы каармандар. Алардын бири — Каракол шаарында жашаган Нургүл Шахтёрбек кызы. Аймактык кабарчы Караколдогу жаш көп балалуу эне менен маек курду.
- Нургүл Шахтёрбек кызы 1992-жылы Ысык-Көл облусунун Ак-Суу районуна караштуу Ак-Суу айылында төрөлгөн. Каракол шаарындагы №3 Тилекмат аке атындагы мектепте билим алган.
Нургүл айым 18 жашында турмушка чыгып, 19 жашында алгачкы ирет эне болуу бактысын сезген.
«Ал күнү өзгөчө толкундангам. Чыныгы бакыт ушул экен деген сезимге ээ болдум. Мээримдүү эне болууга болгон умтулуум дагы күчөдү», — дейт ал.
Нургүл айым жалгыз кыз болгондуктан, бала кезинен көп балалуу болуп, чоң үй-бүлө курууну кыялданчу. Бүгүнкү күндө анын тилеги орундалып, 8 баланын энеси болду. Учурда тогузунчу наристесин күтүп жатат. Анын төрт кызы, төрт уулу бар.
«Атам каза болуп калгандыктан, апам экөөбүз эле жашадык. Жалгыз кыз болгондуктан, дайыма көп балалуу үй-бүлөлөргө суктанар элем. “Өйдөдө өбөк, ылдыйда жөлөк болгон бир туугандарың болсо кандай бакыт” деп ойлочумун. Ошол кичине кезимден эле көп балалуу, чоң үй-бүлөлүү болсом деп кыялданчумун. Кудайым буйруп, балдарымды берди», — дейт ал.
Улуу кызы Жаркынай 8-класста окуйт. Фатима 3-класста, Нурайым 2-класста, Эмир 1-класста билим алууда. Ал эми кичүүлөрү — Малика 6 жашта, Ырыскелди 5 жашта, Ынтымак 3 жашта, 1 жаштагы Мухаммад үйдүн кубанычы.
Нургүл айым үчүн эң чоң бакыт — балдары. Ал ар бир баласын карап, алардын күлкүсүн көргөн сайын өзүн бактылуу сезерин айтат. Жолдошу эртең менен жумушка кетип, кечинде кайтып келет. Үй-бүлөнү материалдык жактан камсыз кылуу жолдошунун мойнунда болсо, үй ичиндеги жоопкерчилик Нургүл айымга жүктөлгөн.
«Жакшы эне болууга дайыма аракет кылам. Балдарымды убагында сабакка кечиктирбей жиберип, ар биринин татыктуу билим алышына көңүл бурам. Баарына бирдей тарбия бергенге умтулам. Балдарымды башкаларга каратканга көп деле ишене бербейм. Ошондуктан өзүм балага жакынмын десем болот. Балдарды ыймандуу, ынтымактуу кылып тарбиялаганга аракет кылам. Эки-үч жыл мурун балдарды апам каралашып турчу. Азыр апамдын көзү өтүп кеткен», — дейт ал.
Нургүл айымдын жашоосундагы эң унутулгус күндөрдүн бири — өз үйүнүн курулушу бүткөн учур. Ал күндү өзгөчө кубаныч менен эскерет.
«Балдарымдын ырыскысы менен үйлүү болдук. Үйдү салып бүткөндө балдарымдын бактысына аябай кубангам», — деп Кудайга шүгүр келтирет.
Нургүл айым учурда 7 же андан ашык бала төрөп, тарбиялаган энелерге берилүүчү мамлекеттик сыйлык — «Баатыр эне» орденин күтүп жатат.
«Наамды алууга документтерди даярдап өткөргөнбүз. Учурда күтүп жатабыз. Ушул келе жаткан май айында келип калат экен», — дейт ал.
Ошондой эле Шахтёрбек кызы 9 ай мурун Эмгек, социалдык камсыздоо жана миграция министрлигинин социалдык келишим программасы аркылуу каражат алган.
«Ал каражатка балдардын кийимдерин алып келип, базардан соода кылчумун. Учурда кош бойлуу болгондуктан, үйдөн бир аз сатып жатам», — дейт ал.
Нургүл айымдын алдыдагы чоң максаты — балдарына татыктуу билим берүү.
«Быйыл “Баатыр эне” орденин алган энелердин балдарына жогорку окуу жайларда жеңилдиктер берилет деген мыйзам мага абдан жагымдуу болду. Балдарым кичинесинен жакшы билим алып, чоңойгондо бир кесиптин ээси болушса деп тилек кылам», — деп сөзүн жыйынтыктады ал.