Turmush — Ош технологиялык университетинде «Ачык эшиктер күнү» иш-чарасы жогорку деңгээлде уюштурулуп, Ош шаары, Ош, Баткен жана Жалал-Абад облустарынан келген 2 000ге жакын мектеп бүтүрүүчүлөрү, абитуриенттер, ата-энелер жана мугалимдер катышты.
Иш-чаранын негизги максаты — келечектеги абитуриенттерге университеттин билим берүү мүмкүнчүлүктөрү, институттары, колледжи, адистиктери жана окуу шарттары тууралуу кеңири маалымат берүү болду.
Катышуучуларга ОшТУнун институттары, колледжи, билим берүү багыттары, кабыл алуу тартиби, студенттер үчүн түзүлгөн шарттар жана келечектеги мүмкүнчүлүктөр тууралуу кеңири маалыматтар берилди. Ошондой эле алар университеттин окуу корпустары, лабораториялары, заманбап инфраструктурасы жана материалдык-техникалык базасы менен жакындан таанышышты.
Иш-чаранын алкагында бош орундар жармаңкеси уюштурулуп, өнөктөш ишканалардын өкүлдөрү, иш берүүчүлөр жана ар түрдүү мекеме-уюмдардын жетекчилери студенттерге жана абитуриенттерге эмгек рыногундагы талаптар, кесип тандоо жана келечектеги жумуш мүмкүнчүлүктөрү тууралуу маалымат беришти.
Мындан тышкары концерттик программа уюштурулуп, университеттин чыгармачыл студенттери өз өнөрлөрүн тартуулашты. Катышуучулар үчүн кызыктуу оюндар, сертификаттар, баалуу белектер жана акчалай сыйлыктар ойнотулуп, өзгөчө баш байге катары Ташкент шаарына жолдомо тапшырылды. Лотереянын жеңүүчүсү болуп №30 А.Алиев атындагы орто мектебинин окуучусу Агерим Абдумомунова табылды.
Иш-чаранын жүрүшүндө университеттин ректору, профессор Жанболот Турсунбаев сөз сүйлөп, ОшТУ — билим, илим жана инновациянын борбору экенин белгилеп, жаштарды туура кесип тандоого жана сапаттуу билим алууга чакырды.
Ошондой эле мектеп директорлору, мугалимдер, ата-энелер жана иш берүүчүлөр менен өзүнчө жыйын өткөрүлүп, окуу иштери боюнча проректор Улукбек Мамытов университеттин окуу процесси, билим берүүнүн сапаты жана кабыл алуу мүмкүнчүлүктөрү тууралуу кеңири маалымат берди.
«Ачык эшиктер күнү» абитуриенттер үчүн келечектеги кесиптик жолун аныктоого, туура тандоо жасоого жана ОшТУ менен жакындан таанышууга чоң мүмкүнчүлүк түздү.