Turmush — «Жеңеке» рубрикасынын кезектеги каарманы — 31 жаштагы Асель Эргешова. Учурда ал үй-бүлөсү менен Москва шаарында жашайт. Азыр ал декреттик өргүүдө, беш баланы багып-өстүрүүдө. Аны менен Turmush басылмасынын кабарчысы маек курду.
- Асель Эргешова 1995-жылы Баткен шаарында төрөлгөн. Ал Баткен гуманитардык-экономикалык колледжин «бухгалтер» адистиги боюнча аяктаган. 18 жашында өз алдынча жашоого кадам таштап, ошол эле учурда кесиптик билимге ээ болгон.
Ал болочок жолдошу — Ош шаарынын 1993-жылы туулган тургуну Сайдин Калмурзаев менен Москва шаарында таанышкан. Аселдин айтымында, бул бир көргөндөгү сүйүү болгон.
«Биз сүйлөшүп, 2 жылдай мамиле курдук. Бирок кийин эки жолго түштүк. Андан соң мен Баткен шаарына кеттим. Кийин белгилүү болгондой, ошол учурда Сайдин да Кыргызстанда экен. Бир аз убакыт өткөндөн кийин кайра байланышып калдык. Андан соң Сайдин кайра Россия Федерациясына иштеп келүү үчүн кетти. Ал акча таап келип, мени алып кетерин жана сөзсүз үйлөнөрүбүздү айткан», — дейт Асель.
Бир айдан кийин Сайдин Аселге Москвага келиши үчүн акча жөнөткөн. Асель кийимдерин, чемоданын чогултуп, ата-энесине эч нерсе айтпай, унаа менен Москвага жол тарткан. Анын ата-энеси кызынын кеткенин билген эмес.
Асель Москвага жеткенден кийин Сайдин бул тууралуу өзүнүн ата-энесине кабарлаган. Андан соң Сайдиндин ата-энеси Аселдин ата-энесине куда түшүү үчүн Баткен шаарына барышкан. Башында Аселдин атасы алардын баш кошуусуна каршы болгон. Бирок күйөө баланын ата-энеси келип, аны менен жеке сүйлөшкөндөн кийин макулдугун берген.
Кийин алар кыргыздын каада-салты менен баш кошушкан. Мечитте нике кыйылып, расмий түрдө жубайлар болуп калышкан. Дүңгүрөгөн той болгон эмес, баары жөнөкөй өткөн.
Асель кыргыздын каада-салттарын толук биле бербесин, бирок жолдошу дайыма жардам берип, салт-санааларды түшүндүрүп турарын айтат.
Аселдин айтымында, жолдошунун көптөгөн достору жана тааныштары аны биринчи көргөндө орус улутундагы кыз деп ойлошкон. Азыр да ал «Сиз кыргызсызбы? Мен сизди орус деп ойлогом» деген сөздөрдү көп угат. Ошондой эле бир жолу жолдошу экөө метронун жанындагы отургучта отурганда милиция кызматкерлери келип, документти Аселге көңүл бурбай, күйөөсүнөн гана текшеришкен.
Учурда Асель декреттик өргүүдө. Ал балдар кийимдерин сатуу менен алектенет.
Келечекте Асель жана анын үй-бүлөсүнүн негизги максаты — Кыргызстандагы үйүн бүтүрүп, мекенге кайтып келип жашоо.
Асель өзүнүн үй-бүлөсү тууралуу да айтып берди. Атасы тараптан чоң энеси орус улутунан, ал эми чоң атасы Баткен облусунун тургуну, кыргыз болгон. Аселдин чоң энеси Жалал-Абад шаарында жашап, билим алган. Кийин практикага Баткен шаарына келип, ошол жерден болочок жолдошу менен таанышкан. Андан соң экөө баш кошушкан. Аселдин чоң апасы Кыргыз Республикасынын эмгек сиңирген мугалими болгон жана билим берүү тармагына кошкон салымы үчүн президенттин сыйлыгына ээ болгон.