Turmush — Ош шаарында 29 жаштагы тургунуна «айдоочулук күбөлүк алып берем» деп, 100 миң сом акча алууга шектелген адам кармалды. Бул тууралуу Ош ШИИБдин басма сөз кызматы билдирди.
Маалыматка караганда, Ош шаарынын ички иштер башкармалыгына кайрылган аял ал киши ушул жылдын апрель айынын алгачкы күндөрү жалгандан өзүнүн ишеничтүү тааныштары бар экендигин айтып жана тез арада мамлекеттик «Унаа» ишканасынан айдоочулук күбөлүктү алып берүүнүн убадалап, адегенде 50 миң сом, кийинчерээк калган 50 миң сом сумманы алып, бирок убадасын аткарбай койгондугун билдирген. 21-апрель күнү кылмышка шектүү катары Ноокат районунун 1997-жылы туулган Ж.А. аттуу тургуну кармалып, убактылуу кармоочу жайына киргизилди. Анын үстүнөн Кылмыш-Жаза кодексинин 209-беренеси (алдамчылык ) менен кылмыш иш козголуп, тергөө иштери жүрүп жатат.
Тергөө кызматынын алгачкы маалыматына караганда шектүүнүн азыркы, акыркы паспортун алмаштыргандагы аты-жөнү Ж.А. болгон. Алгачкы аты-жөнү З.Д. болгон. Мурда бир нече жолу алдамчылык иштери боюнча бир нече кылмыштары үчүн кылмыш жоопкерчилигине тартылган.