Turmush — Барскоон—Бедел унаа жолунун жалпы узундугу боюнча геодезиялык жана инженердик-геологиялык изилдөөлөр толук аяктады.
Транспорт министрлигинин маалыматына караганда, курулуш иштери бекитилген графикке ылайык жүргүзүлүүдө. Учурда бетон заводдорунун, майдалоо-сорттоо комплекстеринин, карьерлердин, вахталык шаарчалардын жана башка убактылуу курулмалардын курулушу жүрүп жатат.
Долбоорго ылайык 2 тоннель курулат:
- №1 тоннель (Сөөк) — узундугу 5 340 метр;
- №2 тоннель (Ашуу-Суу) — узундугу 3 788 метр.
Көпүрөлөр боюнча иштер азырынча даярдык баскычында.
Азыркы учурда объектте 557ге жакын кызматкер эмгектенүүдө. Кошумча адистерди тартуу пландалууда.
Барскоон — Бедел унаа жолунун жалпы узундугу болжол менен 161 чакырымды түзөт. Жол Ысык-Көл облусунун түштүк жээгинде жайгашкан Барскоон айылын Кыргызстан менен Кытай Эл Республикасынын мамлекеттик чек арасындагы «Бедел» өткөрмө пункту менен байланыштырмакчы.
Долбоордун алкагында унаа жолунан тышкары 50дөн ашык көпүрө, 2 тоннель, ошондой эле коргоочу жана кошумча инженердик курулмалар курулат.
Долбоорду ишке ашыруу 2025-жылдын 26-августунда башталган. Курулуш иштеринин жалпы мөөнөтү болжол менен 5 жылды түзөт.