Turmush — Кочкор районунун Ормон хан айыл аймагынын айылдарында малчылардын көчүп конуусу боюнча жыйын өттү.
Жайыт иштери боюнча адис Мирлан Кыдырбаевдин айтымында, быйылкы жылга малчылар жайлоого чыкканда жайыт билетин алып чыгышы керек. Жайыт билет албаган чабандар жайлоого чыга албайт.
«Мурда жайыт акысын форма-3 менен төлөп келишкендиктен малды жашырып, аз мал каттатып келишкен. Мындан ары ар бир түтүн менен келишим түзөбүз. Быйыл 1 бодого 125 сомдон, бир кой-эчкиге 25 сом, топозго 600 сомдон жайыт акысы белгиленген. Мал багуучулар бир бодону 600 сомдон, кой-эчкини козу, улагы дебестен 100 сомдон багышат. Кээ бир чабандарга адамдар жөн кой кошуп, күздө келгенде арашан кой кошком деп чырдашкандар болууда. Ошол себептен арашан койлорду албай, алса да баасын көтөрүп кошсо болот.
20-апрелде айдоо аянтты бошотуп сарайга, адырларга көчүп, 1-майдан баштап жаздоо-күздөөгө көчүп, 20-июндан баштап алыскы жайлоолорго көчүүсү керек», -деди ал.
Ормон хан айыл өкмөтүнүн башчысы Талант Абдылдаев эгерде мал эгинге кире турган болсо, мал камакка алынып, 7000 сомдон айып пул бекитилгенин айтты. Эгер экинчи жолу түшсө дагы кайрадан айып пул салынат. Ошол себептен көчүү, конуу иштери боюнча кирген тартипти сакташы керек. Камакка алынган малды айып пул салынбаса чыгарып бергенге болбойт. Эгер айып пул төлөп чыгарып кетпесе, мал камакта ачкадан өлүп калса жооп бербей турган болуш керек деген чечим кабыл алынды.