Turmush — Кара-Балта шаарында лизинг шартында «ISUZU SAZ HC45 CNG» үлгүсүндөгү 24 автобус сатып алуу пландалууда. Мындай чечим 2026-жылдын 10-апрелинде шаардык кеңештин сессиясында кабыл алынган.
Автобустардын наркы салыкты кошпогондо 68,5 миллион сомду түзөт.
Белгиленгендей, бүгүнкү күндө шаарда жүргүнчү ташуу №2, №3, №5, №6, №7, №8 жана №9 каттамдар боюнча жүзөгө ашырылат. Каттамдардын бир бөлүгүн жеке компания тейлейт. Ал эми «Кара-Балта шаарынын жол-курулуш башкармалыгы» муниципалдык ишканасы №6 жана №7 каттамдарын гана тейлейт. Учурда 17 автобустун ичинен 12-14 автобус гана күн сайын линияга чыгат, бул туруктуу иштөө үчүн жетишсиз.
Шаардык кызматтардын маалыматы боюнча, суткасына 22 миңге чейинки жүргүнчү ташылат. Ал эми каттамдардын аралыгы нормативдик 8-10 мүнөттүн ордуна 15-25 мүнөткө жетет. Эң көп жүргүнчү ташылган учурларда транспорттун толуп кетиши байкалат, бул жашоочулардын нааразычылыгына себеп болууда.
Бийлик өкүлдөрү Кыргыз-өзбек өнүктүрүү фонду аркылуу 24 бирдик транспорт сатып алуу зарыл чара катары каралып жатканын айтышты.
Долбоорду ишке ашыруу линиядагы автобустардын санын көбөйтүп, каттамдардын аралыгын кыскартып, ашыкча жүктү азайтып, жүргүнчүлөрдү ташуунун сапатын жакшыртат деп күтүлүүдө.
2024-жылы мэрия тарабынан 1 миллиард сомдон үнөмдөлгөн каражаттын эсебинен 17 автобус сатылып алынган.
«Жол-курулуш башкармалыгы» муниципалдык ишканасынын (ишкананын алдында муниципалдык автотранспорттун автопаркы ачылган) директору Марлис Эсенгуловдун айтымында, 17 автобустун 14ү күн сайын линияга чыгат. Алар ай сайын 10 тонна (790 миң сом) күйүүчү май сарпташат. Мындан тышкары айдоочулардын жана кызматкерлердин айлык акысына 869 миң сом талап кылынат. Ал эми жүргүнчү ташуудан түшкөн киреше айына 500 миң сомду түзөт.
«Автовокзалдын иштөөсүнө муниципалдык транспорт үчүн айына 1,2 миллион сомдон ашык каражат ишкананын эсебинен бөлүнчү. Буга чейин жеке менчикте турган автовокзалдын аймагы ишканага өткөрүлүп берилгенден кийин биз автопарктар, маршруттук таксилер менен келишимдерди түзүп, автовокзалдын аймагын пайдалануу менен киреше таба баштадык. Имаратты ижарага берүү аркылуу айына 1,7 миллион сом табабыз», - деди Эсенгулов.
Turmush 2025-жылдын май айында Кара-Балта шаарында жүргүнчүлөрдү ташуу үчүн 17 жаңы автобус алынганын жазган.
Маалым болгондой, жаңы автобустар бардык зарыл болгон шарттар менен жабдылган. Мүмкүнчүлүгү чектелген адамдар үчүн 2 түрдүү көтөргүч, уюлдук телефондорду кубаттоочу USB-порттор, кондиционерлер, видеокөзөмөл жана карта менен төлөө үчүн валидаторлор орнотулган.