Turmush — Президент Садыр Жапаров кечээ, 11-апрелде Ош облусунун Араван районунун активи жана жашоочулары менен жолугушту.
Жолугушуунун жүрүшүндө Тепе-Коргон айылынын тургуну Равшанбек Карабаев уулу УКМК тарабынан кармалганын билдирип, жардам берүүнү суранды. Анын айтымында, уулу ишкер, 8 айдан бери Оштогу абакта камакта.
«Балам 30-40 адамды иштетет. "Подстава" кылып, жаткырып коюшту. Жардам берсеңиз. Балам дүкөн курду, оорукана курду. Баламды "подстава" кылышты. "Документ жасап берем, акча алып кел" дешкен. Акча алып барса, УКМК камап койду», - деди ал.
Улуттук коопсуздук мамлекеттик комитетинин төрагасынын орун басары Алишер Эрбаевдин маалыматы боюнча, аталган жарандын бир туугандары ишкерлик кылат.
«Соода борборлору бар, мыйзамсыз курулган. Ал боюнча "Кадастрга" мыйзамдаштырып бергиле деп пара берип жаткан жеринен кармалган. Тергөө амалдары толугу менен бүткөн. Кылмыш иши тергелип бүтүп, сотко берилген», - деди Эрбаев.
Садыр Жапаров: «Документи жок куруп алышканбы?», - деп сурады.
Алишер Эрбаев мыйзамсыз курулганын айтты.
Равшанбек Карабаев: «Документ бар. Кандай документи жок деген?», - деди.
Өлкө башчысы бул иш боюнча бүгүн текшерүү жүргүзүүнү тапшырды. Ошондой эле өзүнүн көзөмөлүнө ала турганын кошумчалады.