Turmush — Ош облусунун «Эркечтам» өткөрүү пунктунда өзүнө ок аткан 22 жаштагы аскер кызматкери жандандыруу бөлүмүндө дарыланып жатат. Бул тууралуу Алай аймактык ооруканасынын башчысы Дайырбек Кадыров Turmush басылмасына берген комментарийинде билдирди.
Анын айтымында, учурда 22 жаштагы жарандын абалы өтө оор деп бааланууда.
«7-апрель күнү саат 20:55те Нура айылындагы ооруканага 22 жаштагы аскер кызматкери башынан октон жараат алып түшкөн. Ал жерде алгачкы медициналык жардам көрсөтүлүп, тез жардам унаасы менен Гүлчө шаарына жөнөтүлгөн.
Келген күнү эле Оштон дарыгерлер келип, шашылыш түрдө башына операция жасалган. Алдын ала байкалгандай, ээгине туштап аткан, ок көзүнүн карегинин жанындагы тамырларын жарып чыгып кеткен. Учурда комада аппаратта жатат. Абалы өтө оор деп бааланууда», - деди Кадыров.
Буга чейин Чек ара кызматы 7-апрелде Ош облусунун Мамлекеттик чек ара кызматынын бөлүмдөрүнүн биринде кызмат өтөп жаткан аскер кызматкер өз жанын кыюуга аракет кылганын билдирген
Маалыматка караганда, 2004-жылы туулган аскер кызматкери И. уулу А. «АК-74» үлгүсүндөгү автомат менен башына аткан.
Аталган окуя тиешелүү укук коргоо органдарына маалымдалып, факт боюнча бардык жагдай жана себептерди аныктоо үчүн кызматтык иликтөө дайындалды.