Turmush — Ош облусунун Өзгөн районунун Өзгөн шаарындагы Манас көчөсүндө жайгашкан үйлөрдүн биринин саркынды суусу Өзгөн-Арык каналына агып жатат. Бул тууралуу жергиликтүү тургундар билдирди.
Алардын айтымында, канализация системасы ишке киргенине карабай, айрым шаар тургундары саркынды суусун каналга агызууда.
Ал эми Өзгөн шаардык мэриясынын маалыматына караганда, кечээ, 7-апрелде мэрия кызматкерлери аталган дарекке барып, саркынды суу эмес экендигин аныкташкан.
«Биз аталган дарекке барып, үй ээлери менен сүйлөштүк. Алар 2 күн мурун сүмөлөк бышырышкан экен. Буудайды тарткандан кийинки суусун убал деп арыкка агызышыптыр. Жергиликтүү тургундарга сыртка эч несени чыгарбоо боюнча түшүндүрүү иштерин жүргүздүк», - деди Өзгөн шаардык мэриясынын аппарат жетекчиси Болотбек Шерматов.
------------------------------------------------------------------------
Turmush 2025-жылдын 11-ноябрында Өзгөн районунун Баш-Дөбө айыл аймагындагы Кош-Коргон айылынын Бак участкасында курулган саркынды сууну тазалоочу станция расмий түрдө пайдаланууга берилгенин жазган.
Маалым болгондой, жалпы аянты 4,71 гектар аянтка курулган саркынды сууну тазалоочу комплекс толугу менен курулуп, административдик имарат, алдын алуу жана биологиялык тазалоо курулуштары салынып, керектүү жабдыктар орнотулду. Долбоор 2024-жылы башталып, жалпы сметалык наркы 2 млн 502 миң 634 еврону түзөт.
Анын ичинен:
• 1 млн 752 261 евро — гранттык каражат;
• 750 миң 373 евро — кредиттик каражат.
Каржылоо Европа өнүктүрүү банкы тарабынан жүргүзүлгөн.
Жаңы станция биринчи этапта суткасына 2000 метр куб саркынды сууну тазалоого жөндөмдүү болуп, болжол менен 10-13 миң абонентти тейлейт.
Станциянын ишке берилиши менен 7 мектеп, 7 бакча, көп кабаттуу үйлөр, социалдык объектилер системага кошулду.