Turmush — Кара-Балта шаарынын 28 жаштагы тургуну Алёна Ковалева күндүз Кыргыз тоо-кен комбинатынын лабораториясында иштейт. Ал бул кесипти мектеп кезинде эле химияга кызыгып тандаган. Ал эми кечинде анын иш орду үйүндөгү чакан устаканага алмашат.
«Лабораторияда иштөө менин кыялым болчу. Бирок бул ошол эле учурда сүйүктүү ишимди каржылоого мүмкүнчүлүк да берет — жип арзан эмес», — дейт ал.
Алёна токууну 4 жыл мурун, жумушсуз калган оор мезгилде баштаган. Анын айтымында, бул тынчсызданууну жеңүүгө жана өзүн алаксытууга жардам берген.
«Үйдө зеригип, оор болуп жатты. Колумду да, оюмду да бир нерсе менен алаксыткым келди. Токууну үйрөнүүнү көптөн бери ойлонуп жүрчүмүн, анан “мына эми убактысы келди” деп чечтим», — деп эскерет ал.
Анын алгачкы эмгеги кичинекей токулган коёнек болгон. Илмектери тегиз эмес, каталары да болгон, бирок дал ошол оюнчук анын жашоосундагы жаңы этаптын башталышына себеп болгон. Алёна аны өзүнүн өкүл кызына белекке берген. Чеберчиликке жетүүнүн жолу оңой болгон эмес. Жаңыдан баштаган кол өнөрчү кыйынчылыктарга туш болуп, кээде бул ишти таштап коюуну да ойлогон. Бирок бурулуш учур анын үй-бүлөсүнүн колдоосу менен келген. Бүгүнкү күндө Алёна жиптин ар кандай түрлөрү менен иштеп, оюнчуктардан тышкары жууркан-төшөк, балдардын кийимдери жана үй жасалгалары сыяктуу буюмдарды да жасайт. Ошентсе да оюнчуктар анын башкы өзгөчөлүгү бойдон калууда.
«Ар бир оюнчуктун өзүнүн мүнөзү болот. Бул материалга да, маанайга да жараша. Кээде бир нерсени ойлоп баштайсың, бирок жыйынтыгында таптакыр башка образ жаралат», — дейт ал.
Анын айтымында, жасоо процесси сейрек учурда гана алдын ала түзүлгөн план боюнча жүрөт. Образдар иш учурунда эле жаралат. Кээде мамалак жасайм деп баштаса, бачики чыгып калат, ал эми “эркек бала” деп ойлонулган оюнчук “кызга” айланып кетет.
Алёна Ковалева эң татаал эмгеги катары токулган паровозду эсептейт. Аны кыска убакыт ичинде жасап бүтүрүүгө туура келген.
«Дээрлик бир сутка бою тынымсыз токуганга туура келди. Тынымсыз жаңылып, кайра-кайра оңдодум. Ошондон кийин шашылыш буюртмаларды албайм деп чечтим — чыгармачылык шашууну жактырбайт», — деп мойнуна алат ал.
Жаңы эмгектерге идеялар ар кандай булактардан келет: мастер-класстардан, интернеттеги сүрөттөрдөн, кокусунан жаралган образдардан. Ошол эле учурда анын өзгөчө ырым-жырымдары жок — эң башкысы маанай. Чыгармачылык тыныгуулар да болуп турат. Кээде Алёна чарчап же жасаган ишине канааттанбай калганда, ишин бир нече күнгө токтотуп коёт.
Алёнанын оюнчуктары балдар арасында гана эмес, чоңдор арасында да өз кардарларын таап келет. Анын айтымында, өзү үчүн эң маанилүүсү — адамдардын эмоциясы.
«Мен үчүн эмгектерим адамдарга кубаныч тартуулашы маанилүү. Оюнчук кимдир бирөөнүн жүзүнө жылмаюу тартуулаганын көрсөм, анда эмгегим текке кетпегенин түшүнөм», — дейт ал.
Ошого карабастан, кээ бир буюмдары менен коштошуу ага оңойго турбайт. Айрыкча, өз сөзү менен айтканда, «мүнөзү бар» болуп чыккан эмгектерин берүү кыйын болот. Келечекте Алёна Ковалева өзүнүн дүкөн-көргөзмөсүн ачууну пландап жатат. Ал жерде ал кол менен жасалган буюмдарын — оюнчуктардан тартып кийим-кече жана үйдүн ички жасалгасына чейинки эмгектерин сунуштоону каалайт.