Turmush —
Ак-Талаа районунун Үгүт айылында 3 чакырым узундуктагы Нарын-Арык каналы тазаланууда. Бул тууралуу аймактык кабарчы билдирди.
Үгүт айыл башчысы Адилет Токон уулунун айтымында, канал көп жылдардан бери казылбай, тазаланбай дыйкандардын үлүш жерлерине сугат суусун жеткирүү жеткиликтүү деңгээлде болбой, көйгөй жаратып келе жаткан. Аны тазалоого Баетов айыл өкмөтү тарабынан атайын техника ишке тартылып, ал эми жергиликтүү дыйкандар күйүүчү майы үчүн 85 миң сом акча чогултушкан.
«Бул канал дыйкандарды кыйнаган көптөн берки көйгөйү болчу. Дыйкандар Нарын дарыясынан техникаларды жалдап, өздөрү чечинип алып чоң дарыяга түшүп, сууну каналга буруп келишет. Каналды казып, тазалап койгонубуз менен көйгөй толук кандуу чечилип калбайт. Бул каналды суу чарба башкармалыгынын карамагына алып, башкы суу алуучу жерине суу бөлүштүрүү курулмасын куруп беришсе жакшы болот эле», - деди айыл башчысы.