Turmush — Бүгүн, 3-апрель күнү Нарын облусунун Ак-Талаа районунда Эл аралык балдар китебинин күнү белгиленип, өспүрүмдөр китеп окууга чакырылды. Бул тууралуу аймактык кабарчы билдирди.
Маалыматка караганда, жаш окурмандарды китеп окууга кызыктыруу, алардын ой жүгүртүүсүн жана чыгармачылык жөндөмүн өнүктүрүү максатында Ак-Талаа райондук Нуркул Кулназаров атындагы маалыматтык китепкананын балдар бөлүмүндө 2-апрель — Эл аралык балдар китебинин күнүнө карата мазмундуу иш-чара өткөрүлдү.
Иш-чаранын жүрүшүндө балдар жомоктор дүйнөсүнө саякат жасап, китеп каармандары менен таанышып, ар түрдүү оюндарга жана викториналарга активдүү катышты.
Жыйынтыгында уюштуруучулар балдарды китеп окууга жана китепканага байма-бай келип турууга чакырышты.