Turmush — Кыргызстанда 15-январдан тарта мөөнөтсүз айдоочулук күбөлүктү алмаштыруу боюнча акция жүрүп, 31-март бул кызмат акысыз көрсөтүлгөн акыркы күн болду. Бул аралыкта Каракол шаарында канча адам кайрылганын Turmush басылмасынын кабарчысы тактады.
Транспорт каражаттарын жана айдоочулук курамды каттоо боюнча мамлекеттик борбордун башкармалыгына караштуу Каракол бөлүмүнүн маалыматына караганда, 2026-жылдын 15-январынан 31-мартына чейинки мезгилде «Түндүк» онлайн системасы аркылуу 11 миң 50 арыз кабыл алынган. Ал эми жарандардын офлайн тартипте кайрылуусу боюнча 5 миң 448 арыз катталган.
Алардын ичинен Каракол шаары боюнча мурдагы СССРдин советтик үлгүдөгү эски айдоочулук күбөлүктөрүнүн 4 миң 613ү алмаштырылды.
Күбөлүктөрдү алмаштыруу программасы толугу менен аяктаган жок. Ал 2026-жылдын 31-декабрына чейин уланат. Бирок 1-апрелден тарта бул жол-жобо акы төлөнүүчү негизде жүргүзүлүүдө. Күбөлүктү алмаштыруунун баасы 1 миң 389 сомду түзөт.