Turmush — Ош облусунун Алай районундагы Гүлчө шаарындагы негизги көчө жабылды. Бул тууралуу шаар мэриясынан билдиришти.
Маалыматка караганда, Гүлчө шаарынын башкы көчөсү болгон Алымбек датка көчөсүн реконструкциялоо иштерине байланыштуу 2026-жылдын 1-апрелинен тарта жолдун 700 метри убактылуу жабылды.
«Бузуу иштерине байланыштуу Алымбек датка көчөсүнүн 700 метри жабылды. Буга чейин жашоочуларга эскертүүлөр берилген. 3 күндөн кийин бузуу иштерин баштайбыз. Жол 3 этап менен жабылып ачылып турат. Азыр 700 метри болот. Андан соң калган бөлүктөрү уланат. Шаар тургундарына ыңгайсыздыктарды туура кабыл алуусун суранып кетем», - деди шаар мэри Нурсултан Тажибаев.
Аталган көчө 4 тилкелүү болуп өзгөртүлүп, Гүлчө шаарынын кире беришинен баштап Курманжан датка участкасына чейин оңдолот.
Ошону менен бирге Курманжан датка көчөсү дагы оңдолуп, 4 тилкелүү болуп өзгөрүлүп, 800 метр жолго жаңы асфальт төшөлөт.