Turmush — Чүй облусунун Кемин районунун Орловка шаардык кеңешинин депутаты Айгүл Кабаева жол белгилери боюнча маселе көтөрдү.
Кечээ, 26-мартта Чүй облусунун Токмок шаарындагы Н.Байтемиров атындагы маданият үйүндө Кемин, Чүй, Ысык-Ата, Аламүдүн райондорунун жана Кант, Токмок шаарларынын тургундары менен жолугушуу өттү. Аталган иш-чарага Чүй облустук ички иштер башкы башкармалыгынын башчысы Каныбек Абдырахманов, райондук мамлекеттик администрация башчылар, мэрлер, тиешелүү мекемелердин жетекчилери, айыл өкмөт башчылары жана аталган район, айыл аймактарынан келген жарандар катышты.
Айгүл Кабаеванын айтымында, жол чырак жок болгондуктан тургундарга кыйынчылык жаралып жатат.
«Биринчи маселе, көпчүлүк учурда эл бийликке социалдык тармактар аркылуу кайрылат. Бирок эмнегедир, жоопсуз калып келет.
Экинчи маселе, Жаӊы-Алыш айылынан Орловка шаарына кайрылган жерге жол чырак керек. Бишкек—Нарын—Торугарт унаа жолунда унаалар тынымсыз жана ылдам өткөнү үчүн адамдар менен малдарга ары-бери өтүү кыйынчылык жаратып жатат.
Ошондой эле Орловкада бир катар көчөлөрдө асфальт төшөлдү. Бирок жол белгилери жок. Анан ылдамдыкты азайтуучу дөӊсөлөр коюлган. Бирок белгилери жок, жолдун сырын билбеген айдоочуларга кооптуу абал жаралып жатат. Бизде 4 кайрылыш жол бар. Ошонун бирөөсүндө эле кайрылыш жол деген белги бар. Калгандарында жок. Караӊгыда билинбей калат. Ал жер өтө чукул бурулуш жерлер. Ушул маселелерди карап берсеӊиздер», - деди депутат.
Чүй ОИИБдин башчысы Каныбек Абдырахманов тиешелүү жетекчилерге маселени чечүүгө 1 жума убакыт берди.
«РИИБ башчысына 1 жума убакыт берем. Бир жуманын ичинде белгилер коюлбаса, чара көрүлөт. Жол тейлөө ишканасы, аким, мэр менен биргеликте бүтүргүлө», - деди ал.