Turmush — Көчмөндөр оюндарына Жалал-Абад облусунан суу алып баруу үчүн тандалган 34 жаштагы баатыр Бедиярбек Кадырбек уулу даярдыктарын көрүп, машыгып жатат. Аймактык кабарчы аны менен таанышты.
Өзүнүн айтымында, 20 талапкердин ичинен тандалган. Учурда Ички иштер министрлигинин «Шумкар» атайын багыттагы полкунун Манас шаарындагы өзүнчө ротасында иштейт. 2021-жылы самбо боюнча Кыргыз Республикасынын чемпиону аталган.
«Өзүм Сузак районунун Жаңы-Дыйкан айылынан болом. 2018-жылдан бери «Шумкар» атайын багыттагы полкунун Манас шаарындагы өзүнчө ротасында эмгектенип келем. Күч түзүмдөрүндө иштөө менин бала кездеги кыялым болчу. Жаш кезден спортко жакын өскөнүм үчүн жумушка келгенде көнүшүү оңой болду. Анкени биздин жумушта кызматкердин физикалык даярдыгы маанилүү роль ойнойт. Мекемеде мен сыяктуу спорт менен машыгып өлкөнүн желегин желбиреткен ондогон кызматкер бар. Аларга жетекчилик тараптан дайыма колдоо болуп турат.
Ал эми, Көчмөндөр оюндарына облустун жүзү катары талапкерликти көрсөтүүнү Сузак райондук админстрациясынан жана мекеменин жетекчилигинен сунуштап калды. Бардык керек документтерди тапшырып, маектешүүгө бардым. Ал жерде 19 жигит бар экен. Алардын дээрлик баары узун бойлуу, спорт менен машыккан белгилүү спортчу балдар экен. Бирок алардын ичинен мен тандалдым. Баатырга болгон эң чоң талап анын физикалык даярдыгы жогору болушу керек экен. Мындан улам ушул тапта жумуш менен даярдыкты айкалыштырып алып бара жатам. Бул кабарды ата-энем үй-бүлөм да абдан жакшы кабыл алды. Ушул тапта даярдык көрүп жатам», - деди ал.
Бедиярбек Кадырбек уулу үй-бүлөдө 5 бир туугандын кичүүсү. Жубайы экөө 2 кыздын ата-энеси.
- Буга чейин Бедиярбек Кадырбек уулу VI Дүйнөлүк көчмөндөр оюндарынын алкагында «Биримдик кербени» аймактык маданий долбоору боюнча Чаткалдагы Ыдырыс пайгамбардын күмбөзүндөгү булактан чыккан сууну көөкөр менен Бишкек шаарына алып барары белгилүүү болгон. Сууну алып келүү аземи 10-15 июнда уюштурулат.