Turmush — Жалал-Абад облусунун Токтогул районунда агасынан зомбулук көргөнүн айткан 33 жаштагы келинге комплекстүү соттук-медициналык экспертиза дайындалды. Бул тууралуу Turmush басылмасына Жалал-Абад облусук ички иштер башкармалыгынан билдиришти.
Маалыматка караганда, жабырлануучу милицияга 2026-жылдын 3-январында кайрылып, ал каттоого алынган.
«2026-жылдын 3-январь күнү Токтогул РИИБдин нөөмөт бөлүмүнө Токтогул районунун 1993- жылы туулган Г.М. аттуу тургуну арыз менен кайрылган. Анда ошол эле күнү 1991-жылы туулган М.М. аттуу агасы эч бир себеби жок үйүнөн колунан сүйрөп чыгарып, зомбулук жасалгандыгы боюнча билдирип, мыйзам чегинде чара көрүп берүүнү суранган.
Аталган факт Токтогул РИИБдин маалыматтардын электрондук журналына катталып, тергөөгө чейинки текшерүү иштери жүргүзүлгөн.
Тергөө амалдарынын жүрүшүндө жабырлануучу Г.М.га карата дайындалган соттук-медициналык экспертизанын корутундусуна ылайык, жеңил дене жаракаттарын алгандыгы аныкталган. Бирок арыздануучу корутундуга макул эместигин билдирип, комиссиялык жана комплекстүү соттук-медициналык экспертизаларды дайындоо жөнүндө өтүнүч келтирген.
Учурда жабырлануучуга комплекстүү соттук-медициналык экспертиза дайындалып, анын жыйынтыгы чыга элек. Материалдар Кыргыз Республикасынын соттук-медициналык экспертиза борборунда кароодо экендиги маалым болгон. Экспертизанын жыйынтыгы менен юридикалык баа берилет», - деп айтылат милициянын маалыматында.
Учурда тергөө амалдары жүрүп жатат.