Turmush — Ош облусунун Кара-Суу районунда акча каражатын уурдоого шектүү жарандар кармалды. Бул тууралуу Ош ОИИБдин басма сөз кызматы билдирди.
Маалыматка караганда, 2026-жылдын 25-февраль күнү Кара-Суу районунун ички иштер бөлүмүнө 1996-жылы туулган К.Ж. аттуу жаран арыз менен кайрылган. Анда 2026-жылдын 23-февралына караган түнү Кара-Суу районунун аймагында жайгашкан уюлдук телефон саткан дүкөнүнүн ичинен белгисиз жарандар 65 000 АКШ доллар акчасын уурдап кеткендигин билдирген.
Аталган факты каттоого алынып, тергөөгө чейинки текшерүү иштери башталган. Чогултулган материалдын негизинде Кылмыш-жаза кодексинин 205-беренеси (уурдоо) боюнча кылмыш иши козголуп, ыкчам тергөө амалдары башталган.
Кылмыш иликтөө бөлүмү тарабынан жүргүзүлгөн ыкчам издөө иш-чаралардын натыйжасында кылмышка шектүү катары 2009-жылы туулган М.Н., 2001-жылы туулган М.М. жана 2004-жылы туулган К.Т. аттуу жарандар Ош шаарында жана Бишкек шаарында изин жашырып жүргөн жеринен кармалып, камакка алынды.
Тергөө амалдарынын жүрүшүндө кылмышка шектүүлөр уурдалган акчаны үчкө бөлүп алышып, акчанын жарымына Бишкек шаарында автоунаа сатып алып, калганын өз кызыкчылыктарына жумшап жибергендиги аныкталган.
Учурда кылмыш иликтөө бөлүмүнүн кызматкерлери тарабынан шектүүлөрдүн башка кылмыштарга тиешеси бардыгын аныктоо боюнча ыкчам издөө иш-чаралары жүрүп жатат.