Turmush — Кара-Балта шаарындагы Ленин көчөсүндөгү кайың аллеясындагы дарактар белгисиз адамдардын иш-аракетинен улам жабыркады.
Жергиликтүү тургундардын айтымында, окуя 21-мартка караган түнү болгон. Жалпы 24 кайың жабыркаган. Дарактардын сабактарында терең жаракаттар көрүнүп турат. Алардан шире агып, жерди нымдаштырып жатат. Кээ бир кайыңдарда 6-7ден кесилген жерлер бар.
Тургундар дарактарга топурак жабыштырып, өз алдынча сактап калууга аракет кылып жатышат. Ошондой эле жашылдандыруу боюнча адис чакырышкан.
«Кесилген жерлерге караганда муну бала эмес, чоң киши жасаганы көрүнүп турат. Балта же учтуу нерсе менен чапкандай», - дейт тургундар.
Окуя боюнча милицияга арыз берилген.
Кайың аллеясы Ленин көчөсүндө, №8 мектептин аймагында жайгашкан. Кайыңдар 2014-жылы отургузулган.