Turmush — «Манас» аэропортуна бара жаткан жолдо «Мазда» үлгүсүндөгү унаа кырсыкка кабылды. Бул тууралуу Turmush басылмасына күбөлөр билдирди.
Ал эми Бишкек шаардык милициянын кайгуул кызмат башкармалыгынын маалыматына караганда, окуя кечээ, 11-мартта саат 10:00 чамасында болгон. Айдоочу — 2000-жылы туулган А.уулу Н.нын башкаруусундагы «Мазда Демио» үлгүсүндөгү унаа Васильевский тракта түндүк тарапка бара жатып, Учкун айылынын тушунда жолдун четине токтоп турган «Хендай Портер» үлгүсүндөгү унааны артынан сүзүп алган. Кырсыктын кесепетинен жеңил унаанын айдоочусу жана 2000-жылы туулган жүргүнчүсү медициналык жардам сурап кайрылган.
«Бул окуя Бишкек шаарынын ички иштер башкы башкармалыгына катталып, бардык керектүү экспертизалар дайындалып, унаалар айып жайга токтотулду», - деп айтылат маалыматта.