Turmush — Ош облусунун Өзгөн районундагы Өзгөн шаарындагы аймактык оорукананын айланасындагы курулуштар толугу менен алына элек. Бул тууралуу жергиликтүү тургундар билдирди.
Ал эми Өзгөн районунун акими Каныбек Апбасов Turmush басылмасына берген комментарийинде чоңураак курулуштар сот иштерине байланыштуу бузулбай турганын айтты.
«Өзгөн аймактык ооруканасынын айланасы тазаланып жатат. Эки дарыкана менен кафенин ээсинин мамлекеттик актысы бар экен. Чоң имараттардын ээлерин "өз каалооңуз менен өткөрүп бериңиздер, оорукананын аймагында экен" десек, макул болушпады. Ал эми чакан дүкөн ээлери өз каалоосу менен бузуп беришти. Бул ишкерлер чоң инвестиция салдым эле деп сотко берип жатат. Бул жерлер соттун чечими менен мамлекетке кайтарылат.
Архивдик материалдардын баарын көтөрүп жатабыз. Ооруканадан дагы бүт документтерди беришти. Өзгөн аймактык ооруканасы Өзгөн райондук прокуратурага жерди бошотуп берүү боюнча кайрылып жатат. Прокуратура сотко доо арыз менен кайрылуу үчүн тиешелүү иш кагаздарын чогултууда.
Ушул тапка жаңы оорукананын курулушу кызуу жүрүп жатат. 2026-жылдын аягына чейин оорукана толугу менен курулуп, буюрса пайдаланууга берилет», - деди аким.
Өзгөн шаарынын мэринин курулуш иштери боюнча биринчи орун басары Мирзохид Маматкасимовдун айтымында, мэриянын балансындагы объекттер бузулган.
«Бир жарандын кызыл китеби болгону үчүн бузула элек. Ал эми калган жерлер мэриянын балансында болгону үчүн ишкерлер менен келишимдер токтотулган», - деди ал.
Ал эми менчик ээси (кафенин ээси) Рахимжан Васиевдин айтымында имаратын бузуу боюнча эч кимден кат келген жок.
«Мен 1988-жылы жылы алгам. Эгемендүүлүк алгандан кийин документин жасаганбыз. Ал жер кароосуз эле жер болчу. 30 адамды иш менен камсыз кылып, айына 150 миң сомго чейин салык төлөп келгем. Мага бузуу боюнча эч кимден кат келген жок. Жөн эле оозеки айтып жатат. Акимге компенсация төлөп бергиле десем, "мыйзамда каралган эмес" деди. Мен дагы бала-чакамы багышым керек да», - дейт Васиев.
Өзгөн шаарынын мэри Элдос Таев буга чейин оорукананын жалпы аянты 8 гектарды түзөгөнүн, анын ичинен 2 гектар аянты союз таркагандан кийин жеке мекчикке берилип кеткенин билдирген. Ал курулуштарды тазалоо иштерин мэрия жүргүзүп жатканын айткан.
«Оорукананын жалпы аянты 8 гектарды түзөт. 2 гектарга жакын аянт союз таркагандан кийин мэрия тарабынан жеке менчикке, ижарага берилип кеткен экен. Биз адамдар менен сүйлөшүп, түшүндүрүү иштерин жүргүзүп жатабыз. Оорукананын аймагын толугу менен бошотобуз. Кечээ, 8-сентябрда айрым курулуштар бузулган. Айрымдары 2-3 күнгө коё турууну өтүнүп жатышат», - деген мэр.
Өзгөн аймактык ооруканасынын базасында заманбап көп тармактуу оорукана жана жугуштуу оорулар бөлүмү курулууда. Жаңы оорукананын курулушуна 1 млрд 350 млн сом бөлүнгөн. Жалпы 390 орунга эсептелген. Оорукана 4-5 кабаттуу болуп, «Ж» тамгасынын формасында курулууда.
Курулуш иштерин «Кыргызстройсервис» жоопкерчилиги чектелген коому жүргүзүүдө.
Юстиция министрлигинин маалыматтар базасындагы маалымат боюнча, «Кыргызстройсервис» жоопкерчилиги чектелген коомунун жетекчиси катары Кылычбек Өмүрбеков көрсөтүлгөн. Негиздөөчүлөрү — Кубатбеков Урмат Кубатбекович, Толобеков Рысбек Толобекович, Кыргыз Республикасынын Президенттик иштер башкармалыгынын алдындагы «Кыргызстройсервис» мамлекеттик ишканасы.
Негизги ишмердүүлүгү: курулуш иштерин жүргүзүү. Компания 2022-жылдын 13-январында каттоодон өткөн.