Turmush — Бишкек—Ош унаа жолунда «Дэу Матиз» үлгүсүндөгү жеңил унаа менен «Мерседес-Бенц Спринтер» кагышты.
Күбөлөрдүн айтымында, жол-транспорт кырсыгы бүгүн, 10-мартта саат 14:30 чамасында аталган унаа жолдун Сузак районуна караган Таш-Акур айылынын аймагында болгон.
Азырынча кырсыктан адамдар жабыркап же жабыркабаганы тууралуу маалымат жок.
Сузак аймактык жалпы дарыгердик практикалык борборунун башкы дарыгери Акжол Тургунбаев Turmush басылмасына берген комментарийинде кырсык тууралуу тез жардам кызматына чакыруу болгонунун, бирок кызматкерлер барган учурда окуя болгон жерде эч ким болбогонун билдирди.
«Кырсык боюнча бизге чалуу болуп, тез жардам чакыртылган. Биздин бригада чакыруу болгон унаа жолдун Таш-Акур айылындагы тилкесине барганда эч ким жок экен. Менимче жараат алгандар жолдо унаа менен бейтапканага жеткирилген болушу мүмкүн. Бирок биздин бейтапканага жол кырсыгынан жараат алгандар кайрылган жок», - деди Тургунбаев.
Ал эми Жалал-Абад облустук жол кыймылынын коопсуздугун камсыздоо бөлүмү кырсык Жалал-Абад облусу менен Ош облусунун чек арасында орун алганын, бул аймак Жалал-Абад облусуна кирбей турганын билдирди.