Turmush — «Мекендештер» рубрикасынын кезектеги каарманы — 21 жаштагы Шадия Исаева. Ал 3 жылдан бери Түштүк Кореянын Сеул шаарында жашайт. Келечекте модель жана актриса болууну каалаган кыргыз кызы менен Turmush басылмасынын кабарчысы маектешти.
Шадия кыргыздын улуттук кийимдери менен досторун таң калтырып келсе, эми корей элинин да кызыгуусун жаратууда.
«Сеулда жылына эки жолу мода жумалыгы өтөт. Буга чейин иш-чарага көрүүчү катары катышып келгем, бул жолу өз дараметимди көрсөтүүгө мүмкүнчүлүк болду. Жумалыктын төртүнчү күнү улуттук кийим менен чыгууну чечтим. Бирок менде кыргыз кызына таандык көйнөк болбогондуктан, чоң атамдын чепкенин жана чоң энемдин жоолугун салынып чыктым. Менде болгон улуттук кийимдер ушул эле.
Былтыр иним Кыргызстандан келе жатканда улуттук кийимдерден ала келүүсүн сурангам. Алып келген кийимдер менен корей досторумду тааныштырып, аларга белекке бергем. Өзүмдө чоң атам менен чоң энемдин кийимдери эстелик катары калган. Бул кийимдер мага ийгилик алып келди. Жумалыкка келген сүрөтчүлөр менен журналисттер кызыгып, маалымат алышты. Алар бул образды жарашыктуу жана өзгөчө деп баалашты», - деди Исаева.
Шадия корей тилин үйрөнүп, ал жакка баруу кыялы кичинекей кезинен болгонун айтат.
«Сеул шаарына келгениме үч жыл болду. 8-класстан баштап корей тилин үйрөндүм. Ушул өлкөгө келип, кыялымды ишке ашырууну максат кылгам. Алгач ар кандай жумуштарда иштедим. Азыр блог жүргүзүп, корей жашоосу тууралуу жана жарнамалык роликтерди тартып жатам. Келечекте актриса болгум келет. Корей кинолорунда роль жаратуу тилегим бар. Ошондой эле табияты кооз, алмашкыс өз өлкөбүз, маданиятыбыз тууралуу тасма тартып, дүйнөнү суктандыргым келет», - дейт ал.
Ал кыргыз элинин улуулугун, атадан балага өткөн нарк-насилди жогору баалайт.
«Биз кичинекей кезибизден ата-энебизден уккан салт-санаа жана үрп-адаттарыбыз каныбызга сиңип калган. Чоң атам менен чоң энем көзү өтүп кеткен. Алардын тарбиясы, айткан сөздөрү жана кылган эмгеги дайыма эсибизде. Чоң атам Эсен Исаев Ак-Суу айылынын өнүгүшүнө зор салым кошкон инсан болгон. Кийин аксакалдар сотунун төрагасы болуп да иштеген. Мен чоң атам менен сыймыктанам», - дейт.
Шадия Исаева төрт бир туугандын улуусу.