Turmush — Кечээ, 3-февралда Каракол шаардык кеңешинин депутаттары XVI сессияга чогулду. Жыйын кайым айтышуу менен коштолгонун Turmush басылмасынын кабарчысы билдирди.
Күн тартибине коюлган 7 маселенин бири «Муниципалдык объектилерин алмаштыруу тартиби жөнүндөгү жобону бекитүү» маселеси каралды.
Сессияга Каракол шаарындагы Күчүков, Карасаев көчөлөрүнүн кесилишиндеги жаңы конуштун жер ээлери келди. Алардын мыйзамдуу өкүлү Таалай Ашканбаевдин айтымында, аталган аймакта 550гө жакын жер тилкеси бар. Алар 4,5 сотыхтан 2 гектарга чейин тургундарга берилген. Жер ээлеринин кызыл китеби (жер тилкелерине мамлекеттик акты) болгону менен жер айыл чарба багытында болгон. Аны трансформациядан өткөрүү боюнча бир нече жылдан бери аракет кылып келишет. Ал эми жакынкы жылдары аэропорттун кеңейишине байланыштуу аталган жер тилкенин ээлерине башка жактан жер берүү каралган.
«Аэропорттун кеңейишине керек деп башка жактан жер берүү сунушталган. Биз ага макул болдук. Жаңы жерди шаардын ылдыйкы тарабынан Кузбаский, Маманчы районунан берилет деди, ага макул болдук. Андан бери иш жылбай жатат. Депутаттар макул болгону менен мыйзамга туура келбей, улам артка жылып жатат. Мындан улам күч органдарына кайрылууга аргасыз болуудабыз», - дейт тургундардын бири Айбек Оскоев.
Сессиянын жүрүшүндө элдин жерин алмаштыруу үчүн алгач муниципалдык менчик объектилерин алмаштыруунун тартиби жөнүндө жобону бекитүү керектиги айтылды. Депутаттар жободо жер, кыймылсыз жана кыймылдуу мүлк, баары камтылып калганын белгилеп, жобо толук даяр эместигин айтып, кийинки сессияга калтырууну сунушташты. Ага чейин бардык кызматтар бирге жобону карап чыгышы керектигин айтышты.
Ал эми жыйынга келген тургундар бул маселе менен канчалаган мэрге кайрылышканын, жылдап күтүп жатышканын белгилеп, жакынкы арада карап берүүнү суранышты.
Бир канча убакыт талаш-тартыш, кайым айтыштан кийин маселени кароо кийинки сессияга калтырылды.
--------------------------------------------------------------------------
2025-жылдын июнь айынын аягында Каракол шаарындагы И.Күчүков жана К.Карасаев көчөлөрүнүн кесилишинде жайгашкан жаңы конуштун тургундары жер тилкелерин айыл чарба багытынан турак жай курууга ылайыкташтыруу — трансформациялоо маселеси боюнча АКИpress-Ысык-Көлдө пресс-жыйын өткөрүшкөн.
Тургундардын айтымында, бул жер тилкелер 2012-жылы Ак-Суу районунун Октябрь айыл өкмөтү тарабынан бөлүнүп берилген. Азыркы учурда 400дөн ашуун үй-бүлөнүн колунда мамлекеттик актылары — кызыл китептери бар. Бирок жерлер трансформациядан өтпөгөндүктөн, алар үйлөрүн сала албай келишет.
Андан кийин президенттин Ысык-Көл облусундагы ыйгарым укуктуу өкүлүнүн биринчи орун басары Данияр Арпачиев Каракол шаарынын айрым тургундарынын жер маселеси боюнча кайрылуусуна байланыштуу жүргүзүлгөн иштердин жыйынтыгы тууралуу отчет уккан.
Каракол шаардык мэриясынын маалыматына ылайык, жергиликтүү деңгээлде маселелер толук чечилген. Бирок мыйзам боюнча трансформация жүргүзүү үчүн аэродромдун санитардык-коргоо аймагына байланыштуу жарандык авиациянын расмий корутундусу талап кылынат. Бул багытта тиешелүү мамлекеттик органдарга каттар жөнөтүлгөн.