Turmush — Ысык-Көл районунун Корумду айылынын тургуну — жети баланын атасы Нурлан Ибраев өлкө башчысынан турак жай маселесине көмөк көрсөтүүнү өтүндү. Анын айтымында, учурда үй-бүлөсү жети баласы менен бирге агасынын толук бүтө элек үйүндө жашоого аргасыз. Үй-бүлө ээси менен аймактык кабарчы маектешти.
Нурлан Ибраев 1986-жылдын 5-июлунда Чолпон-Ата шаарында төрөлгөн. 2003–2004-жылдары Корумду айылындагы Карамолдо Орозов атындагы орто мектебин аяктап, Темировка айылындагы кесиптик лицейден ашпозчу адистиги боюнча билим алган.
Жубайы Гүлназ Ибраева менен 2012-жылдын ноябрь айында баш кошушкан. Алардын тун кызы Перизат 2013-жылы төрөлгөн. 2015-жылы Алмазбек, 2018-жылы Чыңгыз, 2023-жылы Хадижа аттуу балдары төрөлгөн. Үй-бүлө бешинчи баласын күтүп жаткан учурда үч эмдүү болорун билишкен.
«Жубайым эки айлык кош бойлуу кезинде Чолпон-Ата шаарында УЗИге түшкөндө үч эм экенин айтышты. Бишкек шаарынан скринингден өтүп, кайра УЗИге түшүп келгиле дешти. Ишенбей, бирок туугандарыбыз менен баарыбыз барып, өз көзүбүз менен көрүп, кубандык. Мен өзүм жети бир тууганмын. Бир тууган эжемдин эгиз балдары бар. Тай жагыбызда мурда эгиздер болгон экен. Үч эм көтөрүү өтө оор болду. Кош бойлуулуктун акыркы айларында жубайым ордунан тура албай калды», — дейт Нурлан Ибраев.
Үч эм 2025-жылдын 8-июлунда Бишкек шаарындагы №6 төрөт үйүндө жарыкка келген. Кыздардын салмагы 2,535 кг, 2,345 кг жана 2,525 кг болгон.
«Бир ай эртерээк барып, дарыгерлердин көзөмөлүндө болдук. Бир айдан кийин кыздарыбыз төрөлүп, кубанычыбыз чексиз болду. Төрөттөн кийин 4 күндөн соң үйгө чыгардым. Азыр ден соолуктары жакшы. Аттарын ата-энелерибиз менен кеңешип, Аруузат, Аруужан, Арууна деп койдүк. Учурда үч эм 6 айлык болду», — дейт ал.
Нурлан Ибраевдин айтымында, учурда үй-бүлөнүн өз үйү жок. Алар агасынын жарымы гана бүткөн үйүндө жашап жатышат. Үй салуу үчүн жер алууга айыл өкмөткө кезекке турушкан.
«Айыл өкмөтү тарабынан 2013-жылы жер бөлүнүп, айылга тартылганда мага да жер тийген. Бирок башка бирөөнүн бакчасынан бөлүнүп калып, талаш чыгып кетти. Ошондой эле 4–5 үй-бүлөдө ушундай маселе болгондуктан, айыл өкмөтү башка жер карап беребиз деген. Бирок ошондон бери жер каралып бериле элек. Ошондуктан өлкө башчысынан жана УКМК жетекчисинен турак жай жагынан жардам берүүнү суранат элем», — дейт ал.
Нурлан мырза айыл өкмөтүндө кароолчу болуп иштейт. Айлыгы 8 миң сом. Мындан тышкары, акыркы эки айдан бери жети баласына ар бирине 1200 сомдон жөлөк пул ала баштаган.
«Мурда жөлөк пул албайт элек. Акыркы эки айда жети балага жөлөк пул чектелди. Анда үй жок, жери жок деген шарттардын баары каралды. Жалпысы айына 8 миң сомдун айланасында болот. Бул каражат үч эмдин памперсине араң жетет. Андан сырткары балдар боткосу (смесь), дары-дармек керек. Улуулардын кийим-кечесине, тамак-ашына да каражат кетет.
Мурда жумуштан бош убактымда эс алуу жайларында кошумча кароолчу болуп иштеп, бир аз акча таап алчумун. Азыр үч эмди жубайым жалгыз караганы оор болгондуктан, жумуштан келгенден кийин жардам берип калам. Ошондуктан кошумча иштөөгө да мүмкүнчүлүк жок. Аз айлыгым тамак-аштан артпай, акча чогултуп үй салууга таптакыр шарт болбой жатат.
Турак жай боюнча Социалдык коргоо кызматына кайрылсак, “андай маселе менен бизге кайрылбагыла” деп жооп беришти. Ошондуктан өлкө башчысына кайрылууга аргасыз болдук», — дейт ал.