Turmush — Ысык-Көл облусунун Түп районуна караштуу Каркыра айыл аймагы 11 айылды камтып, анда жалпы 20 миң 692 адам жашайт. 2025-жылы жергиликтүү бюджеттен тышкары ички инвестициялар, дем берүүчү гранттар, республикалык, райондук жана облустук фонддордун эсебинен бир катар маанилүү долбоорлор ишке ашырылды.
Социалдык курулуш багытында Эгемендүүлүктүн 34 жылдыгына карата Ж.Асылбаев атындагы №28 Каркыра жалпы орто билим берүү мектебинин 100 орундуу жаңы имараты пайдаланууга берилди. Калктын коопсуздугун жана саламаттыгын камсыз кылуу максатында Корумду айылында ФАП, Каркыра айылында милициянын жаңы пункту курулуп, ишке кирди. Ошондой эле Көчүү жана Чоң-Таш айылдарында 275 орундуу мектептердин, Сан-Таш (3-ферма) айылында 100 орундуу мектептин, Сары-Тологой айылында 100 орундуу бала бакчанын курулушу башталды.
Өндүрүш тармагында Кең-Суу айылында инвестициялык каражаттардын эсебинен темир-бетон буюмдарын чыгаруучу «Глобал бетон» заводу курулуп, саатына 60 куб метр бетон жана 110–130 тонна таш майдалоо мүмкүнчүлүгүнө ээ өндүрүш ишке кирди. Мындан тышкары, Талды-Суу айылында Түп районунун өнүктүрүү фондунун каржылоосу менен 2 млн 300 миң сомго муниципалдык кичи ишкана ачылып, полистирол блок жана пескоблок өндүрүлө баштады. Натыйжада 10го жакын жумушчу орун түзүлдү.
Ички инфраструктураны өнүктүрүү алкагында Каркыра айыл аймагынын кире беришине стелла орнотулуп, ага Бугу эненин скульптурасы, 11 айылдын символун чагылдырган элементтер жайгаштырылды. Бул долбоорго 2 млн 851 миң сом жумшалды.
Талды-Суу айылынын борбордук бөлүгүндө сквер эс алуу жайы ачылып, Президенттин иш башкармалыгы тарабынан бөлүнгөн каражаттын эсебинен 1,5 гектар аянтка таштаман төшөлүп, тосмолор орнотулду. Ошондой эле түнкү жарыктандыруу, 24 сааттык видео көзөмөл коюлуп, аймак жашылдандырылды.
Мындан тышкары, борбордук көчөгө заманбап шарттагы үч аялдама курулуп, райондук фонддун каржылоосу менен эки жерге жол чырагы орнотулду. Дем берүүчү грант аркылуу Сары-Тологой айылына 1,5 км, Каркыра айылына 2 км, Талды-Суу айылына 1 км асфальт төшөлүп, бардык айылдардын 60 км ички жолдоруна шагыл төгүлүп, оңдоп-түзөө иштери жүргүзүлдү.
Айыл өкмөттүн аппараты, муниципалдык ишкана, маданият кызматкерлери жана айыл башчылары 2025-жылы экология, туризм жана эл аралык маданий иш-чараларга активдүү салым кошкон. Айыл өкмөт башчысы Р. Черикбаевдин айтымында, эл аралык маанидеги Түп—Кеген унаа жолунун курулушу аяктап, казак-кыргыз чек арасы сутка бою иштей баштады. Бул жайкы туризмдин жанданышына өбөлгө түздү.
Анын маалыматына караганда, 2025-жылы «Таза Каркыра» акциясы уюштурулуп, жайлоонун тазалыгын сактоо жана айлана-чөйрөгө аяр мамиле кылуу максатында иш-чаралар өткөрүлгөн. Ошондой эле «Алтын күз» аттуу түшүм майрамы салтанаттуу белгиленип, коңшу өлкөдөн келген меймандар катышкан маданий программа уюштурулган. Натыйжада эки элдин достугун чыңдоо максатында Түп жана Кеген райондорунун жетекчилери кызматташтык тууралуу меморандумга кол коюшкан. Мындан тышкары, жакынкы мезгилде Каркыра айыл аймагы Талас облусундагы Шумкар-Уя айыл өкмөтү менен да «Достук жана кызматташтык» боюнча меморандум түзгөн.
Ал эми 2026-жылга карата ички инфраструктураны өнүктүрүү, ирригация жана ичүүчү суу маселелерин чечүү негизги багыт катары белгиленген. Ичке-Суу айылында таза суу тартылып, Корумду айылындагы суу курулушу 90 пайызга жакын аяктады. Келерки жылы калк толук таза суу менен камсыз болору айтылды. Ошондой эле ички жолдорду асфальттоо, сугат суу каналдарын калыбына келтирүү, райондук суу чарбасы менен биргеликте 6 км жаңы латок тартуу жана суу сактоочу бассейн куруу пландалууда. Туристтик мезгилде Каркыра жайлоосунун тазалыгы туруктуу көзөмөлдө болору белгиленди.