Turmush — Түп районунун Ысык-Көл айыл аймагында күзгү жыйым-терим жумуштарынын алкагында 92 гектар жерге отургузулган алма бактын алгачкы түшүмү жыйналды. Айыл чарба өнөктүгүнө айыл өкмөттүн кызматкерлери, айылдык кеңештин депутаттары, «Таза мурас» муниципалдык ишканасынын жамааты жана жергиликтүү тургундар активдүү катышты.
«Ысык-Көл айыл аймагында жакшы саамалык жүрүп жатат. Айыл өкмөт аппараты менен жергиликтүү кеңештин депутаттары биргеликте ишембиликке чыгып, жаш көчөттөрдүн алгачкы түшүмүн жыйнап жатабыз. Бул башталышы гана, келерки жылдары түшүм мындан да мол болот. Келечекте жергиликтүү өндүрүштү ишке ашыруу аркылуу айыл аймактын жашоо турмушун жакшыртып, кошумча жумуш орундарын түзөбүз», — деди айылдык кеңештин төрагасы Орозбек Мукамбетов.
«Жашыл мурас» интенсивдүү алма-бак долбоору президенттин 2022-жылдын 31-январындагы №17 «2022-жылды Тоолордун экосистемасын коргоо жана климаттык туруктуулук жылы деп жарыялоо жөнүндө» жарлыгын ишке ашыруу жана жергиликтүү бюджетти жогорулатуу максатында жүзөгө ашырылды.
Анын алкагында Ысык-Көл айыл аймагынын Михайловка айылындагы №312-контуруна кирген, айыл чарба багытындагы мамлекеттик фонддун курамындагы асылдуулугу төмөн 92 гектар жерге интенсивдүү алма бак уюштурулган. Бул аймакка 102 миңден ашуун алма, алмурут, кара өрүк жана кокон гилас көчөттөрү отургузулган.
Ысык-Көл айыл өкмөтүнүн башчысы Урмат Бозгунов быйылкы жылы алгачкы түшүм ийгиликтүү жыйналып, кайрак жерди өздөштүрүү үчүн керектүү инфраструктура түзүлгөнүн билдирди.
«Михайловка айылындагы бул жерлер 2022-жылга чейин жергиликтүү тургундар тарабынан ижарага алынып, эгин айдалчу. Бирок кайрак жердин түшүмдүүлүгү төмөн болгондуктан, президенттин жарлыгынын негизинде "Жашыл мурас" өнөктүгү башталганда кайрак жерди өздөштүрүү долбоору ишке кирди. Анын алкагында 8 чакырым аянтка траншея казылып, суу топтоочу жай курулду. Сугат суу жеткирүү үчүн 4 миң метр арык кайра калыбына келтирилди. Насостук система аркылуу агын суу таштандылардан чыпкаланып, тамчылатып сугаруу жолу менен мөмө-жемиштерге үзгүлтүксүз берилип жатат. Ошондой эле электр жарыгы тартылып, кампалар жана техника токтотуучу жай салынды. Жакын арада коопсуздук маселесин күчөтүү максатында видеокөзөмөл орнотулат. Өз учурунда көчөттөрдү бутоо, кыйыштыруу сыяктуу түйшүктүү иштер жүргүзүлдү. Анын натыйжасында 2025-жылы алгачкы түшүмдү жыйнап жатабыз. Алгачкы чогулган түшүмдү шире чыгарууга пайдаланабыз, келечекте мөмө-жемиш сактоочу жай куруп, продукцияны кышка чейин сактап сатабыз. Андан ашкан түшүмдөн шире, как жана башка азыктарды чыгаруу аркылуу ата мекендик өндүрүштү өнүктүрүүнү пландап жатабыз. Алма-бак ири түшүм бере баштаганда 350гө жакын адам жумуш менен камсыз болот. Айыл өкмөт дотациядан чыгып, жергиликтүү бюджет да көбөйөт», — деди Урмат Бозгунов.
Ысык-Көл айыл аймагындагы «Жашыл мурас» интенсивдүү алма-бак долбоору ишке ашкан аянтка 1964-жылдан бери сугат суу жеткен эмес. Кайрак жерди өздөштүрүүгө жергиликтүү бюджеттен, долбоордук жана башка каржы булактары аркылуу жалпы 25 миллион сом жумшалган.
Иштин жүрүшүндө жарыктандыруу, тамчылатып сугаруу системасы, атайын сактоочу кампалар жана айыл чарба техникалары менен камсыздоо иштери аткарылган.
«Алма бакты өстүрүү жана багбанчылык иштерин айыл өкмөтүнүн алдындагы "Таза мурас" муниципалдык ишканасы көзөмөлдөйт. Сугат суу атайын суу топтоочу жай аркылуу насостук система менен запасталат да, жерди 4 тилкеге бөлүп, тамчылатып сугаруу жолу менен берилет. Бул ыкма абдан натыйжалуу болду — жаш көчөттөр эки жыл аралыгында эле түшүм бере баштады. Айыл чарбасын мындан ары да өнүктүрүү максатында мөмө-жемиш өстүрүүгө арналган оор жана жеңил техникалар жаңыланууда. Түшүм жыйналгандан кийин механикалык жол менен чөп тазаланып, көчөттөр буталат, жер семирткичтер жана витаминдер берилет», — деди «Таза мурас» ишканасынын жетекчиси Аскат Казакбаев.