Turmush — 30 жаштагы каарманыбыз Мамура Рапикова — өлкөнүн түштүк аймагындагы жалгыз аял уролог. Учурда ал Жалал-Абад облустук клиникалык ооруканасынын урология бөлүмүндө эмгектенет.
Анын айтымында, бул кесипти тандоосуна аялдардын урологиялык оорулар менен көп кайрылганы жана айым дарыгерлердин жоктугу таасир эткен.
«Өзүм Сузак районунан болом. Мектепти аяктагандан кийин Жалал-Абаддагы медициналык окуу жайга тапшырып, аны 2018-жылы аяктадым. Ошол кезде эле хирург же уролог болсом деген ой болгон. Бирок үй-бүлөлүк жагдайларга байланыштуу үй-бүлөлүк дарыгер адистиги боюнча эки жылдык ординатураны өтөдүм. Андан соң кесибимди кайра адистештирип, урология багытында билимимди тереңдеттим», — дейт Мамура айым.
Үй-бүлөлүк дарыгер болуп иштеп жүргөндө аялдардын урологиялык оорулар менен көп кайрылганы аны бул адистикке түрткү берген.
«Бизге көп учурда аялдар, жаш келиндер урологиялык оорулар менен келишчү. Урологго жолдомо берсек, көп учурда алар дарыгерге көрүнүшпөй кетишчү. Себеби, бул кесипти негизинен эркектер аркалагандыктан, кээ бир жолдоштор «менталитетке туура келбейт» деп аялдарын кайра жетелеп алып чыгышчу. Бир жолу жаш кош бойлуу келинге операция жасалышы керек болуп, бирок урологдун текшерүүсүнөн өтүүсүнө жолдошу каршы болуп, ал текшерилбей калган. Ушул окуя мага катуу таасир этти. Ошондон кийин уролог адистигин кайра тандап, билимимди уланттым. Негизинен менин бейтаптарымдын көбү аялдар, ал эми эркектерге тиешелүү процедураларды эркек кесиптештерим жүргүзүшөт», — деп түшүндүрдү ал.
Коомчулукта «урология — бул эркектердин гана кесиби» деген түшүнүк али да күч.
«Урология адистиги тууралуу эл арасында кеңири түшүнүк жок. Көпчүлүк бул тармакты аялдарга ылайык эмес деп ойлошот. Кээ бир кесиптештерим да башында «карындашым, уролог болгондон көрө педиатр же хирург болсоң болмок» дешчү. Бирок мен алардын сөзүнө маани бербейм. Анткени, мени дайыма жолдошум жана үй-бүлөм колдоп турат», — дейт каарман.
Акыркы жылдары аялдар арасында урологиялык оорулар көбөйгөн.
«Азыр пиелонефрит, цистит, кош бойлуу аялдардын бөйрөк шишиши, гидронефроз сыяктуу оорулар менен кайрылгандар көп. «Аял уролог бар экен» деп, бейтаптар Ош облусунун Өзгөн, Кара-Суу, Ноокат райондорунан да келип дарыланып жатышат. Мурда аял уролог болбогондуктан, бейтаптар эркек дарыгерге кайрылууда ыңгайсыз абалга туш болушчу», — дейт ал.
Мамура Рапикова үй-бүлөлүү, үч баланын энеси.
Жалал-Абад облустук клиникалык ооруканасынын урология бөлүмү 25 орундуу болуп, анда 18ге жакын кызматкер калктын саламаттыгы үчүн эмгектенет.