Turmush — «Мекендештер» рубрикасынын кезектеги каарманы — Россияда күндүз дарыгер, кечкисин таксист болуп иштеп жүрүп, өзүнүн клиникасын ачкан Умүт Мамытова.
Кыргызстандык Мамытова Үмүт Табалдыевна, көп жылдан бери Россия жергесинде эмгектенет. Ал убагында ар кандай жумуштарда иштеп жүрүп, өзүнүн эмгекчилдиги менен жеке менчик дарылоо клиникасын ачты.
Каарманыбыз 1989-жылы 12-апрель күнү Ош шаарында төрөлгөн.
Аны менен аймактык кабарчы таанышты.
«Өзүм үй-бүлөлүмүн, 5 уулдун энесимин. Атам Таабалды өмүр бою мугалим болуп Ош мамлекетттк университетинде эмгектенди. Тилекке каршы 2020-жылы COVID учурунда каза болду. Апам Өктөм кесиби боюнча мугалим бирок үй кожейкеси, азыр ардактуу эс алууда. 2 бир туугандын улуусумун. Инимдин аты Жоомарт, Ош мамлекеттик институтун бүтүрүп, азыр ординатурада окуп жатат. Буюрса келечекте аты далайга чыккан мыкты даарыгер болот деген үмүттөмүн», – деди каарманыбыз өзү жана ата-эне, бир туугандары тууралуу.
Каарманыбыз кантип медицина кызматы менен такси жумушун чогу алып кеткенин айтып бери.
«2015-жылы турмуш шартка байланыштуу Санкт-Петербург шаарына келгем. Кадимки эле мигрант болуп! Алгач чакан «Супница» деген кафенин кассасында, андан кийин магазиндерде, шаурма жасаган жерде иштеп жүрдүм.
Кийинчерээк дипломдорумду настрификацияга берип, экзамендерди тапшырдым. Алар даяр болгуча кошумча жумушка чыгып, үй тазалап иштедим. Бир күнү иштеп жүрүп, такси кылып көрсөм кантет деп таксопаркка бардым. Анан эле дароо эле ключ карматып, линияга кошуп коюшту. Элестетиңиз, чоң шаар жана чоочун жолдор. Бирок, ошол эле күнү жүргүнчү алып, навигатор менен кадимкидей иштеп кеткем. Документтерим даяр болуп, дипломум россияга жарактуу болгондон кийин сайттарга резюме таштадым.
Анан «Супер жоб» сайты аркылуу мага чалышып, баарлашууга чакырышты. Ал жактан өтүп кеттим. Саат 09:00 дан 15:00 чейин иштей турган болдум. Түштөн кийин бош болуп калат экенмин деп таксини таштабадым. Ошентип врачтык кесип менен таксини чогу алып, 2 жылдан ашуун иштедим. Кудайыма миң мертебе шүгүр. Учурда өзүмдүн жеке клиникам бар. Жумушта ар кандай кардарлар келет. Жаш эле кыздар киста, миома, поликистоз, бесплодия, аборты кылганы келгенде, ичиңен кейип каласың. Кээбиринде шарт жок болсо, каражаттан жардам берип кетиребиз», – деди ал.
Үмүт айым жашоосу, келечектеги максаттары тууралуу да айтып берди.
«Жумушум жакшы жашоо шартым сонун, балам садике барат, жолдошум өзүнүн жумушу менен алек. Ар кандай иш чараларга катышып, кесибимдин арты менен ардак баракчаларды, сертификаттарды алып жүрөм.
Келечекте өтө көп сонун максаттарым бар. Өз мекенимде иштеп, агарып-көгөрүп, ата-эне, тууган-уруктун, досторумдун жанын да болсок дейм. Бош убактымда ырдаганды жактырам, музыкага жакынмын. Ал эми чет өлкөгө Россиядан сырткары 2015-жылы Түркияга барып келгем. Анда эс алганча товар алып келип саткам. Эми буюруп насип кылса жаны жылга Тайландка барабыз деп план кылып турабыз», – деди ал.