Turmush — Ар бир чоң иш майда, бирок маанилүү кадамдан башталат. Айрыкча кыргыз тили менен таанышуу жана ага болгон сүйүүнү калыптандыруу жөнүндө сөз болгондо бул өзгөчө мааниге ээ. Globus дүкөндөр тармагы кичинекей кыргызстандыктар үчүн Bereke Books басмасы тарабынан даярдалган уникалдуу китепти — «Абв Алиппе: оку, сез, изилде» чыгаруусун колдоду.
Китеп бала кайра-кайра ачкысы келгидей жасалган. Бала манжалары менен кармап өткөргөнгө ыңгайлуу калың беттер, тамгалардын контурлары түшүрүлгөн трафареттер, түшүнүктүү тапшырмалар — мунун баары бөбөктүн тилди оюн түрүндө жеңил үйрөнүшүнө жардам берет.
Улуттук колорит менен жасалган иллюстрациялар балдарды күнүмдүк тиричиликтеги буюмдар менен гана эмес, Кыргызстанды өзгөчө кылып турган элестүү образдар менен да тааныштырат.
«Ишенем, ар бир бала сүйүү менен жасалган кооз жана сапаттуу китепке татыктуу. Андан ал өзүн, маданиятын жана өлкөсүн тааныйт. Китеп окууга болгон адат — бул өмүр бою берилчү белек. Аны биз, ата-энелер, балдарыбыз менен чогуу окуп, жаш кезинен тарта калыптандырабыз. Китептен ой жүгүртүү, кыялдануу жана ишеним башталат. Алар таланттын, мээримдин жана чоң кыялдардын пайдубалына айланат», — дейт долбоордун автору жана басманын негиздөөчүсү Гүлназ Асакеева.
«Абв Алиппе: оку, сез, изилде» — бул жөн гана тамгалар менен тыбыштар эмес. Бул тилди сезүү, аны түшүнүп, сүйүүнү үйрөнүүгө жасалган алгачкы кадам. Бала тыбыштарды сөзгө айкалыштырып үйрөнгөндө, ал үй-бүлөнүн жана мекендин үнүн уга баштайт. Ишеним табат, кыялданууга жана өнүгүүгө болгон каалоосу күчөйт.
Мындай китептер ата-энелердин үнсүз жардамчысына айланат: уктаар алдында, бала бакчага барар жолдо, үй-бүлөлүк дасторкондо.
«Азыркы заманда — экрандар баарлашууну көп учурда алмаштырып калган шартта, бала кезден тарта кыялдуулукту, ой жүгүртүүнү жана китеп окууга болгон сүйүүнү өнүктүрүү абдан маанилүү. Бул долбоор учурдагы боштукту толуктап, кичинекей окурмандарга билим алуу үчүн сапаттуу, жаркын жана жеткиликтүү ресурс берет. Ал билим берүү менен маданияттын өнүгүшүндө чоң рол ойнойт», — деп белгиледи «Умай Групп» компаниясынын PR-менеджери Бермет Танабаева.
Долбоор үстүнөн кесипкөй команда иштеди. Текстти филология илимдеринин кандидаты жана жазуучу Иманак Сагынбеков менен эмгектин мыктысы Раина Асакеева даярдашты. Иллюстрацияларды Kholant-art студиясы иштеп чыкты. Ал эми редакторлор менен дизайнерлер китепти ыңгайлуу жана көркөм кылып беришти.
Тираждын чоң бөлүгү сатууга чыгат, ал эми бир бөлүгү Globus тармагынын сатып алуучулары жана кызматкерлери арасында белекке таратылат. Бул аркылуу дагы көп балдар кыргыз тили жана маданияты менен таанышуу мүмкүнчүлүгүнө ээ болушат.
Белгилей кетчү жагдай, бул демилге 23-сентябрь — Кыргызстандын мамлекеттик тил күнүнө арналып, «Умай Групп балдар үчүн» долбоорунун алкагында ишке ашырылды. Бул компаниянын билим берүү, чыгармачылык жана балдардын ар тараптуу өнүгүүсүн колдоого багытталган социалдык программасы. Долбоор маданий, спорттук, билим берүү жана кайрымдуулук демилгелерин бириктирет.
«Умай Групп» — өлкөдөгү эң ири ритейл компания. Азыркы тапта ал Globus, SPAR, «Народный» жана «Достор» деген төрт тармактагы дүкөндөрдү жана супермаркеттерди башкарууда. Компаниянын 155тен ашык дүкөнү бар, күн сайын 150 миңден ашуун сатып алуучу тейленет.