Turmush — Ош облусунун Өзгөн районуна караштуу Көлдүк айылынын 23 жаштагы тургуну Санжар Акылбек уулу тайган багуу менен алектенет. Ал учурда айылда мал чарбачылык жүргүзүп, тайгандарын аңчылыкка машыктырып келгенин айтып берди.
Санжар мурда Россияда 6 жыл иштеп жүргөн. Эки жыл мурун апасынын ден соолугуна байланыштуу айылга кайтып келген. 2025-жылдын май айында үй-бүлө курган.
Анын айтымында, тайганга болгон кызыгуусу бала кезинен башталган. Себеби атасы тайган багып, аңчылыкка чыгарган.
«Шаарда жүрсөм да айыл өзүнө тарта берчү. Жаш кезимден тайгандар менен түлкүгө, чөөгө аңчылык кылып жүрдүм», — дейт ал.
Азыр Санжарда 4 тайган бар: экөө ургаачы, экөө эркек. Мындан сырткары, бир якк породасындагы аңчы итин да багат. Жаш жигит тайгандардын аңчылыктагы өзгөчөлүктөрүн баса белгилеп, аларды «күлүк, шамдагай жана акылдуу иттер» деп мүнөздөйт.
«Тайган менен бир жолу аңчылыкка чыгып көргөн адам сөзсүз тайган багат десем жаңылышпайм. Тайгандар бири-бирине аябай көнүп калышкан. Аңчылыкка чыкканыбызда, сүйлөшүп алгандай, бир команда болуп иштешет. Олжону көрүп калганда алардын күлүк, шамдагай жана акылдуу экенине дагы бир жолу ынанасың. Тайгандын тиши башка иттерге салыштырмалуу абдан курч болот», — деп белгиледи Санжар.
Ал башынан өткөн кызыктуу учурларды да эскерди.
«Жыл сайын жайлоого чыгабыз, бээ, уй саайбыз. Бир күнү жайлоого кетип, эртеси таң атпай үйгө келдим. Атты байлап жатканымда тооктор какылыктап калды. Артымдан тайгандарым чуркап чыкты. Артынан мен да барсам, алар түлкүнү өлтүрүп салышыптыр. Үйдө чоң корозум бар эле, түлкү ага тийиптир. Бирок корозго тиши өтпөй, жүнүн жула бериптир. Барып көрсөм, байкуш короз жүнсүз калыптыр. Коркконунан 3 күн кыйкырбай, араң төртүнчү күнү үн чыгарганы эсимде.
Дагы бир окуя. Бир күнү шашылыш ишим чыгып, портер менен шаар жакка жөнөдүм. Жолдон бирөөгө жолуктайын деп токтосом, тайганым артымдан ээрчип жүрөт. Машинага отурсам, тайган да аркасына чыгып алыптыр. Ошондо айланасындагылар көрүп таң калышкан», — деди ал.
Санжардын максаты — тайгандарды селекциялоо жана кыргыз тайганын дүйнөгө таанытуу.