Turmush — Аксы районунун Ак-Жол айыл аймагына караштуу Райкомол айылында 25 жылдан бери коломто отун өчүрбөй жашап келе жаткан Майрамбек Алыбаев менен Гүлбурак Кушубакова 14 баланын ата-энеси болушкан. Балдарынын улуусу 24 жашта болсо, эң кичүүсү 1,5 жашка толгон. Балдардын шаттуу күлкүсү жаңырып турган бул куттуу үй-бүлөнүн жашоосу менен Turmush басылмасынын аймактык кабарчысы таанышты.
Гүлбурак Кушубакованын (1981-жылы туулган) күнүмдүк турмушу таңкы саат 5те ойгонуу менен башталат. Ал мындай графикке көнүп калган. Быйыл алгач ирет жайлоого чыгууга бел байлап, мектеп жашындагы 4 баласы менен бирге мал саап, курут жана май жасап жатат. Бул аракетинин негизги максаты — балдарына жаңы окуу жылы үчүн кийим-кече, керектүү буюмдарды алып берүү.
«Мектепке 8 балам барат. Аларга бир сыйра кийим алып бергенде эле шайыбыз кетип калат. Былтыр кийим-кечелерди Базар-Коргондон алганбыз, ал жакта арзаныраак экен. Ар бирине эптеп бирден кийим алып бергенде эле 40 миң сомдон ашык каражат кетти. Айылда жолдошум экөөбүз тең туруктуу иштей турган жумуш жок. Балдарга 40-50 миң сом таап, кийим алып берүү оңойго турбайт. Кээде бирине кичине болуп калган кийимди кийинкиси кийип, ошентип чоңоюп жатышат. Балдарыбызды эч нерседен кем кылбай багабыз деп аракет кылып келебиз.
Быйыл айылдагы бир тааныштын мал-жандыгын алып, жайлоого чыктык. 8 саан уй бар экен, курут, май жасап жатабыз. Балдар да кенен ак ичишет, кичине тыйыны да болот. Кичүү балдарды атасы карайт, алар үйдө эле болушат», — дейт ал.
Гүлбурак айым жаштайынан эле көп балалуу болууну, айрыкча эгиздүү болууну самачу.
«Мисалы, өрүктүн данеги кош чыкса, “эгиз” деп сүйүнүп жечүмүн. Эгиз балалуу болууну кыялдангандыктан, ушундайча ырым кылып жүрчүмүн. Аллахым тилегимди берди — азыр эгиз кыздарым бар. Кудайга шүгүр, баарын кыйналбай эле өзүм төрөдүм. Толгоодон да анча кыйналган жокмун. Ден соолугум жакшы болгондуктан төрөй бердим. Акыркы кызымды кесарево жолу менен төрөдүм, ошондо бир аз кыйналып калдым. Болбосо дагы 1-2 балалуу болсомбу деп ойлончумун. Эми болду, токтотом го. Эгер ден соолук жол берсе, төрөгөн жакшы деп эсептейм. Ар бир бала өз ырыскысы менен чоңоё берет», — деди ал.
Гүлбурак айымдын айтымында, «болду эми, мындан ары төрөбө» деген пикирди айткандар арбын болгон.
«Эмнегедир “төрөбө” деген сөз мага оор тийчү. “Кыйналса, мен кыйналам” деген жообумдан кийин көптөр унчукпай калчу. Ар тараптан акыл айткысы келгендер көп болду, бирок алардын пикирине кулак салгым келбейт. Эч кимди укпай жүрүп, 14 бала төрөдүм .
Башында балдарым кичине болчу, жашаган жерибизди көчүрүп-кондуруп жүргөндө кыйналдым. Үчүнчү балам төрөлгөндө азыркы үйүбүздү сала баштадык. Бала эмизип коюп эле суу ташычумун. Ылдыйдан чакалап суу ташып жүрүп, ушул үйдү бүтүрдүк. Балдар чоңойгондо бири-бирин жетелешип, ойноп эле чоңоюп кете беришет экен.
Мурда балдарым кичинекей кезде дээрлик айылчылап чыга албайт элем. Азыр улуулары кичүүлөрүн карап отура беришет, ошондуктан колу-бутум кыйла узарып калды», — дейт ал.
Бул үй-бүлө жашаган үй айылдан обочо, бийик жерде жайгашкан. Айылдын негизги көчөсүнөн үйүнө жетүү үчүн токой аралап, 20 мүнөттөй жөө басууга туура келет. Өзгөчө кыш мезгилинде же жаздагы жаан-чачындуу күндөрдө мектепке кеткен кичинекей балдарын жолдон тосуп алышат. Кышкысын, караңгы кирген маалда, балдар үчүн бул жол оорчулук жаратат.
8 кыз, 6 уул төрөгөн Гүлбурак айым үчүн күн сайын нан жабуу көнүмүш ишке айланган.
«Казанга жабылган нанды балдар жакшы көрүшөт. Күн сууктап баштагандан бери күндө 7-8 нан жаап калабыз. Андай нанды 10-15 мүнөттө эле бышырып алса болот. Жайында болсо нанды күн алыс жабабыз. “Күндө нан жаап, тамак жасап чарчабайсыңбы?” дегендер болот. Бирок бул — күнүмдүк эле жумуш. Мен үчүн бул иш деле эмес, маселе да болбойт. Күзүндө жангак терип алаксыбасак, башка иш деле жок. Тынымсыз кыймылга көнүп калганмын, — дейт ал.
Бул үй-бүлөнүн тун кызы Акзыйнат — 24 жашта. Ал турмушка чыгып, учурда бир баланын энеси. Бой жеткен балдарынын бири Ош шаарындагы музыкалык окуу жайында билим алууда. Үчүнчү баласы быйыл мектепти аяктады.
Үй-бүлөнүн кожоюну Майрамбек Алыбаев айылдагы маданий иш-чараларга активдүү катышып жүргөн таланттуу адамдардын бири. Ал 3-класстан бери комуз чертип, ырдап келет. Анын бул өнөрү балдарына да өткөн: атасы комуз чертип жатканда, балдары кошулуп ырдаган учурлар көп болот.
«Кошуна агам көп балалуу болчу. Мен да көп балалуу болсом экен деп кыялданчумун. Кудайым жубайым экөөбүздүн тең тилегибизди берди, — дейт Майрамбек Алыбаев.
Жубайлар балдарына Акзыйнат, Сыймык, Азимбек, Айбийке, Асема, Замирбек, Белек, эгиздерге Айкыз менен Нуркыз, Дилшад, Нуркелди, Раяна жана эң кенжесине Арууна деген ысымдарды беришкен. Арууна азыр 1,5 жашта. Балдарынын ар биринин аралыгы орточо 1,5–2 жашты түзөт.
Үй-бүлө мамлекеттен жөлөк пул алат, бирок ал каражат негизинен тамак-ашка эле жетет. Жакында бул үй-бүлөгө Жогорку Кеңештин төрагасы 7 орундуу автоунаа белекке берди.