Turmush — Жумгал районунун борборундагы «Чаек» муниципалдык ишканасы 2023-жылдын сентябрь айынан бери өз алдынча мекеме катары айыл өкмөттөн бөлүнүп иш алып барып келишет.
Ага чейин айыл өкмөттүн астында Жашылдандыруу жана көрктөндүрүү, тазалык ишканасы катары иш алып барып келген. Жетекчиси Зарылбек Моңошов бул кызматка 2024-жылдын июль айынан бери иштеп келет.
Маалым болгондой, мекемеде учурда жалпы 27 техника жана 2 «Муравей» бар, ал эми бузугу 8. Ишканага жылдан жылга жаңы техника алынып, техникалык базасы жакшырып келет. Ишканада тазалык, көрктөндүрүү, таза суу, жылуулук бөлүмү, суу пайдалануучулар ассоциациясы жана жайыт тармактары кирет. Жалпы 90дон ашык кызматкер эмгектенишсе, алардын дээрлиги кесипкөйлөр. Ишкананын бир жылдык бюджети 18 млн 7800 сом болсо ал каражат жергиликтүү бюджеттен субсидия катары каржыланат. Мындан тышкары ар кандай коомдук жумуштарды жасап кызмат көрсөтүшөт.
Ишкана 2024-жылы план тапшырмасын 111,7% менен аткарып, Нарын облусу боюнча алдыга чыгышкан. Мекеменин жетекчиси Зарылбек Моңошов жол тармагында көп жылдан бери иштеп, чарба жумуштарын жакшы билгендиктен, бул жаатта ишти алып кетүү оңой болгонун айтып, ишкананын тейлөөсү күн сайын жакшырып жатканына токтолду.
«Мурдагыга салыштырмалуу иштер жакшы, жыл сайын жаңы техникалар менен камсыз болуудабыз. Ал эми кызматкерлер буга чейин 8-10 миң сом алды 12-18 миң сом айлык алып келишкен болсо, азыркы учурда арты 24-25 миң сомдон кем эмес, алды 30-35 миң жана эмгек стажысы барлар 40-45 миң сомго чейин эмгек акы алып келишет. Айылдын тазалыгы, таза суусу, жылуулугу, жайыты жана сугат суусунун барын өзүбүз көзөмөлдөйбүз», - деди Моңошов.
«Чаек» муниципалдык ишканасы дүйшөмбүдөн ишембиге чейин эртең менен саат 07:00-09:00гө чейин, кечинде 20:00-23:00гө чейин атайын уюшулган графиктин негизинде таштанды тазалоо күзөтүнө чыгышат. Ал эми шейшемби күнү Көк-Ой, шаршемби күнү Кара-Жээк, Беш-Терек, жума күнү Кызыл-Жылдыз айылын түрө кыдырып, таштандыларды тазалашса, бейшемби жана ишемби күндөрү Чаек айылынын толук көчөлөрүнүн кыдырып чыгышат.
Андан тышкары социалдык мекемелерден, тургундардан түшкөн ар кандай кайрылуулардын негизинде жумуштар аткарылып турат. Ошондой эле 1 айда 2 жолу дем алыш күндөрү эртең менен 06:00дөн баштап, Чаек айылынын борбордук көчөсүн актап сырдоо, тазалоо ирээтке келтирүү менен ар кандай жумуштар аткарылып турат. Анткени дем алыш күндөрү автотранспорт каражаттарынын кыймылы аз каттамда болгондуктан ушундай график түзүлгөн.
Таштандыларды чыгарууда Чаек айылдык кеңештин токтому менен бекитилип берилген тариф Чаек айыл аймагындагы жеке менчик үйлөрдөн 100 сомдон, ашкана, дүкөн, дарыканалардан ай сайын 500 сомдон акча каражаты чогултулат.
Мекеме келерки жылдан тарта өзүн өзү каржылоого өтүүнү пландап келишет. Ага таштандыларды кайра иштетүү боюнча атайын пресстөөчү жабдыгын жана желим баштык, бөтөлкөлөрдү майдалай турган жабдуу алышкан. Эми жакынкы күндөрү айылдарга коомдук жайларга заманбап урналар коюлат.