Turmush — Ысык-Көл облусунун Жети-Өгүз районундагы Барскоон айылынын тургуну Улан Абылказиев 20 жылдан бери Сарычат-Ээрташ мамлекеттик коругунда корукчу болуп эмгектенип келе жатат. Аны менен Turmush басылмасынын аймактык кабарчысы маек куруп келди.
Каарманыбыздын атасы 1990-жылдары Ак-Шыйрак айылына мугалим болуп барып, ошол бойдон ошол жакта калып калышкан.
«1990-жылы атам алыскы Ак-Шыйрак айылына мугалим болуп барып, ошол Сырт өрөөнүнө жашап калдык. 1990-1999-жылга чейин Ак-Шыйрак жатак мектебинде окуп, андан кийин кесипке ээ болдум. Бирок кайра алыскы Сыртка барып калдым. Ак-Шыйрак эмнегедир өз кучагынан чыгаргысы келбедиби айтор ошол жакта 35 жылдан бери жашап келем.
20 жылдан бери Сарычат-Ээрташ мамлекеттик коругунда корукчу болуп эмгектенип келе жатам. 5 жыл Сыртта маданият үйүнүн башчысы болуп иштедим. 2 чакырылышта жергиликтүү айыл аймакта депутат болдум. Үй-бүлө күтүп, ушул тоолуу аймакта жашап келем», - дейт Улан мырза.
Коёнду деген тилкеде корукчу болуп иштеп жүргөндө президент Садыр Жапаров үйүнө конокко келгенин жана башка кызыктуу окуяларын айтып берди.
«Ошол кезде уулум Бактияр 5 жашта эле. Президент Садыр Нургожоевич Кумтөр маселеси боюнча келип, ошондо биз жашаган чакан үйгө баш багып, уулум менен сүрөткө түшүп кеткен эле. Азыр ошол уулум 17 жашка чыкты.
Сүрөт 2012-жылы тартылган.
Мурда илбирстин, аюунун издерин көрүп сүйүнсөк азыр бет маңдай кездештирип калабыз. Ак илбирс да биздин чөлкөмдө көбөйүп калды.
Кече жакында эле корукту кайтарып тоодо жүрсөм 2 турист келип, "түлкү жүрөт сүрөткө түшүп алсак болобу?" деп сурашты. Мен "макул" дедим. Аңгыча эле экөө чуркап келди, көрсө ал карышкыр экен. Экөө болуп аман калышыптыр.
Өзүм ар дайым кырга чыгып, гитаранын коштоосунда ырдап келем. Ак-Шыйрак, мекенди сүйүү, сүйүү темасында ырларым бар. Тоодо ушинтип өмүр өтүп жатат. Мурда ылдый көлгө түшкөн Америкага барып келгендей эле болчу. Азыр да транспорт каттап калбадыбы. Ошондо деле жол жабылып калса 6 айлап тоодон түшпөйбүз», - дейт ал.
Корукчу 3 уул, 1 кыздын атасы.
Видеодо Улан Абылказиев Ак-Шыйрак ырын аткарып жатат
