Turmush — Кечээ, 12-мартта Чүй облусунун Панфилов районуна караштуу Букара айылында жыйын өттү. Бул тууралуу Turmush басылмасынын аймактык кабарчысы билдирди.
Маалым болгондой, анда таза суу, жайыт маселеси, маркумду акыркы сапарга узаттууда ысырапкорчулукка жол бербөө, үй-бүлөдөгү зордук-зомбулук жана башка маселелер боюнча түшүндүрүү иштери жүрдү.
- Админстративдик-аймактык реформадан кийин Орто жана Вознесеновка айыл аймактары бириктирилип, жаңы аталыштагы Орто-Кайыңды айыл өкмөтү түзүлгөн. Анын курамына Вознесеновка жана тоо этегиндеги Букара, Тельман, Кум-Арык, Эркин-Сай, Орто-Кайырма айылдары кирет.
Орто-Кайыңды айыл өкмөтүнүн башчысы Жаңылмурза Баязованын айтымында, Букара айылы тоо этегинде жайгашкан айыл аймактагы 6 айылдын бири.
«Жашоочулардын басымдуу бөлүгү мал чарбасы менен алектенет. Элдин эң көйгөйлүү маселелеринин бири таза суу. Аны менен камсыздоо жакынкы жылдарда республикалык бюджеттин эсебинен ишке аша турганы айыл жашоочуларына түшүндүрдүк», - деди ал.
Ал эми Букара айылынын айыл башчысы Оксана Ибрагимова айылдаштарынын таза суу, жайыт жөнүндө көтөргөн көйгөйлөрүнүн чоо-жайы жаатында төмөндөгүлөрдү айтып берди.
«Айылда 1300дөн ашуун калк жашайт. Жергиликтүүлөрдүн эң негизги көйгөйлөрүнүн бири таза суу жана жайыт маселеси. Айыл тургундары тоо койнундагы Орто-Алыш каналы аркылуу агып келип, суу топтоочу жайдан суу түтүктөрү аркылуу айылга тараган таза суу менен камсыздалат. Эгерде катуу жамгыр жааган күндөрдө суубуз ылайланат. Айласыздан ошондон пайдаланууга туура келет. Бул көйгөй көп жылдан бери көтөрүлүүдө. Жыйында жергиликтүү бийликтин аракети менен таза суу маселеси республикалык бюджеттин эсебинен ишке ашуу мерчемделгени айтылды.
Ал эми жайыт маселеси. Бул мал чарбасы менен алектенген элеттиктер үчүн өтө маанилүү. Жерибиз таштак. Ошондон улам жай мезгили башталганда эле чөптөр саргайып кетет. Ырас, көп мал кармагандар жайлоого чыгышат деңизчи. Ал эми бирин-экин малы барлар, саан уй багып, сүтүн тапшырып жашагандар үчүн бир топ оор. Мындай учурда арык боюндагы же башка жактардан чөп оруп келип, малга берүүгө туура келет», -деди айыл башчы.
