Turmush — Насирдин Байтемиров атындагы Маданият ордосунда Токмок шаарынын прокуратурасынын демилгеси менен «Сен жалгыз эмессиң» аттуу өспүрүмдөргө жана жаштарга арналган форум өттү. Бул тууралуу мэриянын басма сөз кызматы билдирди.
Маалыматка караганда, ага шаар мэри, шаардык кеңешинин төрагасы, Токмок шаарынын прокурору, Улуттук коопсуздук мамлекеттик кызматынын Токмок шаары боюнча башкармалыгынын кызматкери, Транспорттогу ички иштер башкармалыгынын жетекчисинин орун басары, Бокс боюнча улуттук курама командасынын башкы машыктыруучусу, мэриянын өкүлдөрү, мугалимдер, орто мектептердин 9-10-11-класстарынын окуучулары катышты.
Форумда окуучулардын жана өспүрүмдөрдүн арасындагы укук бузуулар, мектептеги рекетчилик, буллинг, эрте турмуш куруу, баңгизат, жолдо жүрүүнүн эрежелери сыяктуу социалдык көйгөйлөрдүн алдын алуу, болтурбоо, чыгуу жолдору туурасында сөз болду.
Иш-чаранын башында «Лабиринтте» аттуу видео-ролик көрсөтүлүп, анда мектептеги бейбаштык, буллинг, опузалап акча талап кылуу сыяктуу факторлор камтылган.
№3 орто мектептин «Этюд» форум-театры «Күтүлбөгөн кырсык» спектаклинде бактылуу көрүнгөн үй-бүлөнүн ичиндеги зордук-зомбулукту, ата-эненин жоопкерчиликсиздигин, үй-бүлөдө жашап жатып эле кароосуз калып, бир кыйынчылыктан экинчи кыйынчылыкка туш болгон өспүрүмдөрдүн абалын көрсөттү.
Андан сырткары, прокуратурадан, ички иштер бөлүмүнөн, билим берүү бөлүмүнөн өкүлдөр, диний кызматкер, психолог баяндама беришип, кылмыштуулуктун кесепеттерин болтурбоо жолдорун кимге кайрылуу керектигин көрсөтүп, түшүндүрүп беришти.
№3 орто мектептин «Жезл» жол коопсуздугунун жаш тескөөчүлөрү «Өмүр бирөө гана» аттуу сахналаштыруусунда, окуучулар арасындагы жол эрежелерин бузууга түрткөн себептер туурасында көрсөтмө куралдар менен кыска, так, маанилүү маалымат бере алышты.
