Turmush — «Мекендештер» рубрикасынын кезектеги каарманы — Ысык-Көл облусунун Каракол шаарынын 15 жаштагы тургуну Нурмухаммед Саламатов. Учурда ал ата-энеси менен бирге Египеттин борбору Каир шаарында жашап, эл аралык аль-Азхар университетинде билим алып жатат. Аны менен Turmush басылмасынын кабарчысы маек курду.
Нурмухаммед үй-бүлөсү менен Каир шаарына 2017-жылдын 28-октябрында келген.
«Мен 2010-жылы 21-октябрда Каракол шаарында төрөлгөм. Үй-бүлөдө 4 бир туугандын улуусумун, 2 иним жана 1 карындашым бар. Алардын ысымдары — Абдрахман, Раяна, Абубакир. Иним Абубакирдин атын өзүм койгом. Абубакир пайгамбарыбыздын эң жакын досторунун бири болуп, анын вазириндей (эмирден кийинки даражаны ээлейт) кызмат кылган. Ислам дининин тарашына чоң мээнети бар адам, анын урматына атаган элем», - деди ал.
Анын айтымында, 9 жашында Исламдын ыйык китеби болгон Куранды толугу жаттаган.
«Ысык-Көл облусунун тарыхында алгачкылардан болуп 9 жашында Куранды (114 сүрө, 6236 аят, 77 миң 439 сөз, 333015 тамга бар) толугу менен жаттаган мен болдум. Учурда ар кандай багытта билим алуудамын. Араб тилин терең үйрөнүүнү көздөп, тил борборлорунун биринде окуп жатам.
Муну менен катар эл аралык аль-Азхар университетинин студентимин. Дүйнөдөгү эң байыркы жана абройлуу университеттердин бири. Бул университет 988-жылы алгач медресе болуп курулган, кийин жогорку билим берүүчү окуу жайына айланган. Кудай мага да ушул университетте билим алууну насип кылыптыр. Ата-энемдин эмгегин жана үмүтүн актайын деп, болгон күч-аракетимди жумшап окуп жаткан учурум. Бул университетте Абдышүкүр ажы Нарматов, Жалилов Чубак ажы Тажибаевичдин шакирти Калысбек Заманбеков өңдүү инсандар билим алышкан.
Египетте жүрүп, эне тилимди унутуп калбайын деп кыргыз жана орус тили боюнча онлайн сабак алуудамын. Араб тилинде "иджаза" ("الإِجازَة" араб тилинен кыргызчага которгондо "уруксат берүү", "уруксат кагазы") деген сөз бар. Бул ыйык Куранды толугу менен окуп бүткөндө, башкаларга дагы үйрөтө алат деген атайын уруксат кагазы. Аны дагы алдым, эми дагы билимимди толуктасам, келечекте балдарга Куран үйрөтүп баштайм», - деди ал.
Ал Каир шаары жана жергиликтүү эли тууралуу кеп козгоду.
«Жайкысын мээ кайнаткан ысык болот, жада калса аба жетпей калат. Ачыгын айтканда, Каир таштандыга толгон кир шаарлардын катарын толуктайт. Муну да түшүнсө болот, анткени бул шаарда 22 миллиондон ашуун калк жашайт. Алардын баарын көзөмөлдөө мүмкүн эмес деп ойлойм. Бирок калаа кир болгону менен элинин жүрөгү таза, Кудайдан корккон адамдар.
Шаар тууралуу кызыктардан айтсам, жаңы Каир жана эски Каир деп экиге бөлүнөт. Жаңы Каир 2000-жылдары салынып баштаган. Ал жерде колунда бар адамдар жашайт, эски Каирге салыштырмалуу таза, эл аз, тынч болот. Ал эми эски Каирде тарыхый жерлер абдан көп. Мисалы: "аль-Азхар" мечити, Салах ад-Дин аль Аюби калаасы, дүйнөнүн жети кереметинин бири делген пирамидалар, жер жүзүндөгү узун дарыялардын бири Нил, фараондордун, атактуу кишилердин мумиялары фараон Тутанхамондун алтын жалатылган жыгач айкелдери коюлган чоң музей, Каир телемунарасы бар, айта берсе түгөнбөйт. Мындан сырткары, туристтерди кабыл алчу Шарм-эль-Шейх, Хургада өңдүү керемет шаарлары бар. Дүйнөгө эң чоң китепканасы менен таанылган Александрия порт шаары бар», - деди ал.
Каарманыбыз алдыга койгон ой-максаттары менен бөлүштү.
«Учурда Куран окуу боюнча дүйнөлүк жарышка даярданып, Куранды кайра башынан кайталап, кырааты менен окуп жатам. Буюрса, ал иш-чарага дагы күбө болосуздар.
Күнүнө аткара турчу иштеримдин планын убакыт-саатка чейин бөлүп, алдын ала түзүп алам. Бош убактымда футбол ойноп, бассейнге барам. “ПСЖ” футбол академиясынын Египеттеги филиалында ойнойм.
Ал эми алдыга койгон ой-максаттарым тууралуу айтсам, келечекте хирург болууну кыялданам. Себеби азыр боор оорусунан жабыркаган мекендештерибиздин саны арбын. Адам өмүрүн сактап, бир үй-бүлөгө болсо да кубаныч тартуулагым келет», - деп сөзүн жыйынтыктады Нурмухаммед Саламатов.