Turmush — Чүй облусунун Кара-Балта шаарынын мэриясына караштуу муниципалдык ишкананын автопаркы жаңыланып, 26 атайын техника алынды. Бул тууралуу шаар мэри Мирлан Жекшенов билдирди.
Анын айтымында, техникалардын биринчи партиясында 1 фронталдык жүктөгүч, «Shaman» үлгүсүндөгү 6 жүк ташуучу унаа, 2 суу ташуучу унаа, 1 трал алынып келген.
Экинчи партия менен жолдорду оңдоо жана куруу иштеринин сапатын жогорулатуу үчүн техникалар, тактап айтканда 1 автогрейдер, 2 каток, 1 экскаватор, 1 фронталдык жүктөгүч алынды.
«Бул техникалар жол куруу жана оңдоо иштерин натыйжалуу жүргүзүүгө, ошондой эле жол курулуш башкармалыгынын кызматкерлери үчүн шарттарды жакшыртууга мүмкүнчүлүк берет.
Үчүнчү партиясында асфальт төшөөчү техникалар алынып келди. Бул техника жолдорду жана инфраструктураны жакшыртууга багытталган. Мэрия шаар инфраструктурасын модернизациялоо багытында ишин улантууда. Алдыда дагы 7 атайын техника алынып келет» - деди шаар башчысы.