Turmush — 2024-жылдын 2-ноябрында Чүй облусунун Аламүдүн районундагы Достук айылында Жаманкара Чоткара уулуна арналган айкел жана сейил бактын ачылышы өттү. Бул тууралуу райондук мамлекеттик администрациядан билдиришти.
Иш-чарага президенттин Чүй облусундагы ыйгарым укуктуу өкүлү Канат Жумагазиев, Мамлекеттик тил жана тил саясаты боюнча улуттук комиссиянын төрагасы Мелис Мураталиев, Аламүдүн районунун акими Азамат Эргешов жана жергиликтүү тургундар катышты. Иш-чара концерттик программа жана спорттук оюндар менен коштолду.
«Мурда парктын орду ачык аянт болчу. Учурда реконструциядан кийин стела, арка, отургучтар коюлуп, атайын ландшафттык дизайн менен жашылдандырылды. В.И.Лениндин эстелиги да реставрацияланды. Түнкү чырактар орнотулуп, сейилдөөгө ыңгайлаштырылды», - деп айтылат маалыматта.
Ачык булактардагы маалыматтарга караганда, Жаманкара баатыр 1845-1847-жылдары кыргыз жерин баскынчылардан коргоодогу эрдиги менен тарыхта калган. Ал Солто уруусунан чыккан. Алгач Кененсары басып киргенде элди уюштуруп, көпкө чейин жоону өткөрбөй, каршылык көрсөтүшкөн.
Жаманкара баатырдын урпактары азыр Аламүдүн районуна караштуу Кайырма айылында жашап жатканы айтылат.
