Turmush — Алай районунун Памир-Алай айыл аймагына караштуу Сары-Могол айылында жаңы бала бакча курулуп жатат. Бул тууралуу аталган айыл өкмөттүн башчысы Кутманали Анарбаев билдирди.
Анын айтымында, эски бала бакча 1954-жылы курулган. 2013-жылы ӨКМ тарабынан жараксыз абалда экени тууралуу корутунду чыккан.
«Жаңы бала бакча 140 орунга ылайыкташтырылып, эки кабаттуу болуп салынууда. Өткөн жылдын июнь айында курулушу башталган. Учурда биринчи кабаты бүтүп, экинчи кабатында иш жүрүп жатат. Бала бакча республикалык бюджеттен каржыланууда. Баасы 87 млн сомду түзөт. Бул айылда ушул эле бала бакча бар. Быйылкы жылы толугу менен курулушу аяктап, пайдаланууга беребиз. Учурда балдар эски бала бакчада тарбияланып жатышат», - деди Анарбаев.
Курулуш иштерин «Аль Фирдаус» компаниясы» жоопкерчилиги чектелген коому жүргүзүп жатат. Имараттын сметалык баасы — 99 млн 350 миң 734 сом, тендердик баасы — 86 млн 949 миң 906 сом.
Юстиция министрлигинин маалыматтар базасындагы маалымат боюнча, «Аль-Фирдаус» компаниясы» жоопкерчилиги чектелген коомунун жетекчиси жана түзүүчүсү — Абдыраманов Уланбек Бекмуратович. Компания 2015-жылы 2-февралда каттоодон өткөн. Негизги ишмердүүлүгү: турак жайларды жана имараттарды куруу.