Turmush — Кечээ, 8-февралда Нарын мамлекеттик университетинин инновациялык агроборборунда «Бир адистиктен - бир продукт» аттуу көркөм өнөр искусствосу боюнча педагогика, тарых жана окутуунун технологиялары кафедрасынын ага окутуучусу Ж.Т.Мамбеталиев мастер-класс өттү.
Маалым болгондой, мастер-класстын максаты көркөм билим берүү адистигинде окуп жаткан студенттер бир гана көркөм сүрөт боюнча билим албастан, кол өнөрчүлүк устачылыгын да өздөштүрүүгө багытталды. Иш-чарага студенттер, шаардын кол өнөрчүлүккө кызыккан тургундары жана окутуучулар катышып, анын биринчи бөлүгүндө Жолдошбек Тезекбаевич көркөм сүрөт тартуунун өзгөчөлүктөрү, көлөкөлөрдү түзүүнүн, ошондой эле сүрөттү реалдуу жана терең кылуунун сырларын үйрөтүп, кооз боектордун аралашмасы аркылуу керектүү түстөрдү чыгарган сырлары менен бөлүштү.
Экинчи бөлүгүндө болсо, педагогикалык колледждин окутуучусу Майрамкүл Торубаева катышуучуларга кыргыздын кол өнөрчүлүгүндө илгертеден пайдаланып келе жаткан жүндөн түстөрдү тандап сүрөт түшүрүү жана жумшак оюнчук даярда чыгууну көрсөттү.
Эскерте кетсек 2024-жылдын 15-17-январь күндөрү Жолдошбек Тезекбаевич жана көркөм билим берүү адистигинин студенттери Марсбекова Нурзада (ХО-23), Эдилбек кызы Гүлзуура (ХО-22) жана Эмилбекова Алина (ХО-22) Каракол шаардындагы япон эл аралык кызматташтык агенттигинин (JICA) «Бир айылдан бир продукт+1» долбоорунун алкагында кургак жана нымдуу жүндөн уютуп жумшак оюнчук белектерди даярдоо, алардын сапатын жакшыртуу максатында 18 сааттык тренингден өтүп, тажрыйба алмашып келишкен.
Көркөм өнөр искусствосун бардык тармактар менен байланыштуулугун өнүктүрүү зарылчылыгы бар, анткени дыйканчылык, мал чарбачылыгындагы иш процесстери чийме, сүрөттөө, анын дизайны аркылуу окуу каражаттарында чагылдырылат. Малдын, өсүмдүктөрдүн өсүп-өнүгүүсүнө байкоо жүргүзүүдө дагы анын ар бир мезгилдеги жетилүүлөрүн өлчөп сүрөттөө аркылуу салыштыруу иштерин жүргүзүүгө болот. Анын өңү-түсүн байкоого алуу үчүн дагы эле көркөм түс таануу илимдерине таянабыз. Мындан тышкары, акыркы кезде тенденция жашыл экономикага, продукциялар экологиялык таза болуусуна талап коюлуп жатат.