Turmush — Кечээ, 7-февралда президенттин Ош облусундагы өкүлчүлүгүндө коллегиялык жыйын өттү.
Жыйынга министрлер кабинетинин төрагасы — Президенттин администрациясынын жетекчиси Акылбек Жапаров, президенттин Ош облусундагы ыйгарым укуктуу өкүлү Элчибек Жантаев, орун басарлар, акимдер, облустук мекеме-ишканалардын жана жогорку окуу жайларынын жетекчилери катышты.
Анда Ош облусунун аймагында 2023-жылдын жыйынтыгы чыгарылып, социалдык- экономикалык көрсөткүчтөр талкууланды.
Облустун социалдык-экономикалык өнүгүүсүнө салым кошкон жана 2023-жыл ичинде аткарган ишинде ийгилик жараткан мыкты айыл өкмөт жана мекемелер сыйланды. Ош технологиялык университети «Жылдын мыкты университети» аталды.
Ош технологиялык университети — Кыргызстандын түштүгүндөгү технологиялык багытта жогорку билим берген жалгыз университет. Университетти Жанболот Турсунбаев жетектеп келет.
ОшТУ 2023-жылдын октябрь айында Кыргызстанда окуу жайлардын тарыхында биринчи болуп кичи ГЭС курган. Келечекте бул долбоордун ишке ашырылышы менен университетти толук кандуу автономдуу электр энергиясы менен камсыз кылуу максаты коюлган. Муну ар бир фермер, айыл өкмөтү буюртма берсе болот. Бул жараянды Ош облусунун аймагында жайылтуу жана практикалоо максаты коюлууда.
